CОVID-19га қарши эмлашнинг бошланиши озодлик куни ва Ойнинг забт этилиши билан таққосланди
«Бироз ғалати, лекин ўзимни жуда яхши ҳис қиляпман. Мен Нил Армстронг сингари деярли тарихий шахсман, у Ойга илк марта қадам қўйган одамга айланди. Ҳаммаси яхши ўтди, бошқа ҳар қандай дори сингари эмлашда оғриқ сезмадим. Бироз чарчашингиз мумкин, акс ҳолда бошингиз озгина оғрийди, лекин бунга чидашингиз керак», - Свейн Андерсен ҳамшира Мария Голдинг қилган уколни қабул қилганидан кейин ўз ҳис-туйғулари билан ўртоқлашди.
Жараённи Норвегия Бош вазири Эрна Сульберг, Норвегия соғлиқни сақлаш вазири Бент Хойе ва Осло бошқарувчи мери Раймонд Йохансен бевосита кузатиб боришди.
Кейинчалик, Андерсенни вакцинация рамзи деб атаган Норвегия Бош вазири, Pfizer компанияси томонидан ишлаб чиқарилган вакцинанинг яқин ойларда Норвегияга 2 миллион дозаси келтирилишини маълум қилди.
Норвегия Соғлиқни сақлаш вазирлигининг хабар беришича, вакцинанинг дастлабки 10 000 дозаси 26 декабр куни Норвегияга этиб келди ва тахминан 5000 кишига тарқатилди. Умуман олганда, янги 2021 йилга келиб Қиролликка 35 мингга яқин доза келади, сўнгра ҳар ҳафта 40 минг доза юборилади.
Максимал таъсирга эришиш учун эмлашни уч ҳафта оралиғида икки марта олиш керак. Pfizer мутахассислари таъкидлашларича, биринчи дозадан кейин таъсир 52%, иккинчисидан кейин эса 95% гача бўлади.
«Ушбу воқеа бизни ушбу вирусдан халос қиладиган озодлик кунига ўхшайди. Бизда вакцина бўлганида, биз кундалик ҳаётимизга қайтишимиз мумкин. Биз буни 291 кун давомида, яъни Норвегияда CОVID-19га қарши курашиш учун қаттиқ чоралар кўрила бошлаган 12 мартдан бери кутган эдик», - деди Эрна Сульберг.
Муаллиф: Ильяс Омаров
