Чимкентликлар 24 килоли тандирли сомса тайёрлаш орқали рекорд ўрнатди
SHYMKENT. Кazinform – Бу мамлакатда биринчи марта тайёрланган энг катта сомса, деди Қозоғистон рекордлар китобининг расмий вакили Бақитжан Сабитули.
Чимкент - ўзининг меҳмондўстлиги, мазали таомлари билан ташриф буюрувчиларни мафтун этади. Бу ерда ошхонанинг хилма-хиллиги кўп асрлик анъаналар ва турли маданиятлар уйғунлигининг яққол намоёнидир. Ал-Фаробий майдонида бўлиб ўтган тантанада ошпазлар ўз маҳоратларини намойиш этиб, йиғилганларга мазали таомлар таклиф қилди.
2022 ва 2023 йилларда катта муваффақият қозонган «ДәмДәсTour» фестивали бу йил ҳам давом этди ва гастрономик байрам сифатида шаҳарда ўтказилди. Фестивалда 50 дан ортиқ умумий овқатланиш корхоналари иштирок этиб, ўзларининг мазали ва бетакрор таомларини тақдим этди. Тадбирда шаҳар ҳокими Ғабит Сиздиқбеков алоҳида иштирок этиб, ошпазларнинг таомлари, ҳунармандлар маҳсулотлари билан танишди.
Ушбу фестивалнинг асосий янгилиги 24 кг оғирликдаги тандир сомса тайёрлашдир. Бу мамлакатда биринчи марта пиширилган энг катта сомса. Бу ҳақда Қозоғистон рекордлар китобининг расмий вакили Бақитжан Сабитули маълум қилди.
«Бугун мисли кўрилмаган рекорд ўрнатиляпти. Улкан сомса пиширган Чимкент гастрономия пойтахти эканлигидан яна бир далил», - дейди у.
Мазкур улкан сомсани “Камол ота” ошхонаси ошпази Неъмат Нархўжаев тайёрлаган. Бу таомни тайёрлашга 2 ҳафта вақт кетган ва бу осон бўлмаган.
«Биз сомса таркиби ва пишириш усулини ўзгартирмадик. Шунчаки унинг ҳажмини оширдик. Бу қийин бўлганини яширмайман. Аввалига уйда 17 килограмлик сомса тайёрладик. Бу жуда муваффақиятли бўлди. Бугун халққа таклиф қилинган тандирли самса эса 24 кг бўлди», - дейди ошпаз.
Фестивалда нафақат озиқ-овқат, балки махсус автоспорт тадбирлари ҳам бўлиб ўтди.
Қирғизистон, Ўзбекистон, Тожикистон ва Қозоғистоннинг бошқа шаҳарларидан мотобайкерлар Чимкентга келиб, ўзларининг ноёб мотопаради ва мотоцикл шоусини ташкил этди. Ушбу тадбирда 100 дан ортиқ байкерлар иштирок этиб, мотоциклларида шаҳар кўчалари бўйлаб замонавий парад ўтказдилар. Учрашувда шаҳар аҳолиси ва меҳмонлари учун эстрада юлдузларининг концерт дастури намоийш этилди.
