Чимкентда янги технология билан жиҳозланган омбор мажмуаси ва иссиқхона очилади
SHYMKENT. Кazinform – Бош вазир ўринбосари Серик Жуманғарин 1 май куни Чимкент шаҳрига ташриф буюриб, Бош вазирнинг маҳаллий ишлаб чиқаришни қўллаб-қувватлаш бўйича топшириғи доирасида йирик саноат ва қишлоқ хўжалиги объектларининг иши ва қурилиш ишларининг бориши билан танишди. Бу ҳақда Ҳукумат матбуот хизмати хабар берди.
Чимкент транспорт-логистика маркази ҳудудида 5 гектар майдонда “НМИ-Юг” МЧЖнинг кўп функцияли омбор мажмуаси қурилмоқда, лойиҳа қиймати 10,2 миллиард тенге. Қурилишнинг биринчи босқичи жорий йилда якунланиши режалаштирилган бўлиб, мазкур босқичдаги қурилиш-монтаж ишларининг 90 фоизи бажарилган. Омбор биноларининг умумий майдони 22 минг квадрат метрни ташкил этади. “НМИ-Юг” МЧЖ асосчиси Айжан Наимбекованинг сўзларига кўра, бу мослашувчан иқлим назорати тизими, совутгич камераларининг ҳароратини -18 дан +4 даражагача созлаш мумкин бўлган А+ тоифали омборхона бўлади. У кенг турдаги товарларни сақлашни таъминлайди.
Бу ерда бош вазир ўринбосарига «Alsera kz» масъулияти чекланган жамиятининг иссиқхона мажмуасини қуриш лойиҳаси тақдим этилди. Умумий қиймати 650 миллион долларлик сармоявий лойиҳа “Бозариқ” саноат зонасида Туркиянинг «Alarko Holding» компанияси томонидан амалга оширилмоқда. У янги технологиялар ёрдамида 500 гектар майдонда босқичма-босқич амалга оширади. Бу ерда бодринг, помидор, боғ экинлари, илдизмевалар ва бошқа қишлоқ хўжалиги маҳсулотлари етиштириш режалаштирилган. Бу Чимкент шаҳридаги помидор ва бодринг етиштириш бўйича энг йирик иссиқхона мажмуаси бўлиб, бу ерда 2 мингга яқин янги иш ўрни яратилади.
Серик Жуманғарин амалга оширилаётган лойиҳалар истиқболини юқори баҳолади ва давлат томонидан барча зарур ёрдам кўрсатилишини таъкидлади, чунки лойиҳалар қишлоқ хўжалиги маҳсулотларини ишлаб чиқариш соҳасида давлат сиёсатининг мақсади – қишлоқ хўжалиги маҳсулотларини 70 фоизгача чуқур қайта ишлашга эришиш имконини беради.
Бош вазир ўринбосари «AZALA Textile» МЧЖнинг тайёр тўқимачилик маҳсулотларини қайта ишлаш ва ишлаб чиқариш бўйича Қозоғистондаги энг йирик ва ягона тўлиқ циклли тўқимачилик фабрикасига ташриф буюрди. Бу ерда 475 киши меҳнат қилади. Ноёб тўқимачилик фабрикасида ип-калавадан тортиб то тўқимачиликгача бўлган бир неча ўнлаб турдаги маҳсулотлар ишлаб чиқарилади. Корхона қуввати йилига 6 минг 800 тоннадан ортиқ ип-калава, 14 миллион чизиқли метр газлама хомашёси ишлаб чиқаришга етади. Экспортга йўналтирилган корхона бўлган AZALA Textile ўз маҳсулотининг қарийб 70 фоизини Литва, Германия, Италия, Польша, Бельгия, Дания, Латвия ва Туркия каби хорижий давлатларга экспорт қилади.
Ишлаб чиқариш цехларини бориб, фабрика раҳбарияти билан мулоқоти натижасида Серик Жуманғарин мамлакатимиз тўқимачилик ишлаб чиқарувчиси маҳсулотларини давлат эҳтиёжлари учун харид қилишни кўпайтириш имкониятларини ишлаб чиқиш бўйича топшириқ берди.
