Буюк Британиянинг Саутенд аэропортида икки двигателли самолёт ҳалокатга учради
ASTANA. Kazinform – Лондон яқинида жойлашган Саутенд аэропортидан учган кичик самолёт ҳалокатга учради. Бу ҳақда ТАСС агентлиги The Daily Mail нашрига таяниб хабар берди. Маълумотларга кўра, сўз Нидерландга йўл олган Beechcraft King Air B200 бизнес-джети ҳақида кетмоқда.
Самолёт маҳаллий вақт билан соат 15:45 да ҳавога кўтарилиши керак эди, манзили — Лелистад шаҳри бўлган. Ҳозирча икки двигателли турбовинтли самолёт бортида нечта одам бўлгани аниқ эмас. Бундай турдаги самолётда одатда 1–2 нафар учувчи бошқаради ва 13 нафаргача йўловчи ташиши мумкин.
Flightradar хизмати маълумотига кўра, самолёт ҳавога кўтарилиши билан учиш-қўниш йўлагидан узоқлашмаган. The Daily Mail нашри ёзишича, у тахминан 200 км/соат тезликда ҳавога кўтарилиб, бор-йўғи 5 метр баландликка етганидан сўнг ерга қулаган.
Эссекс графлигида жойлашган Саутенд аэропортидан якшанба куни кечқурунга мўлжалланган тўртта рейс бекор қилинди. Шунингдек, Саутендга йўл олган икки самолёт Лондоннинг бошқа аэропортларига — Гатвик ва Станстедга йўналтирилди.
Эссекс полицияси ҳаво ҳалокати юз берганини тасдиқлади:
«Биз Саутенд аэропортидаги фожиали воқеа жойида иш олиб боряпмиз. Соат 16:00 атрофида 12 метрли бир самолёт ҳалокатга учрагани ҳақида хабар олдик. Ҳозирда барча фавқулодда хизматлар билан ҳамкорликда ишлар олиб борилмоқда ва бу бир неча соат давом этиши мумкин. Шу сабабли, ушбу ҳудудни айланиб ўтиш тавсия қилинади», — дейилади полиция баёнотида.
