Бугун Ғалаба куни
ASTANA. Kazinform – Бугун душман армиясининг якуний мағлубияти ва Иккинчи жаҳон урушидаги ғалаба куни. Бу йил Ғалабанинг 80 йиллиги нишонланади.
1941 йил 22 июнда немис армияси СССР ҳудудига ҳужум қилгани МДҲ давлатларининг расмий тарихида 4 йиллик урушнинг бошланиши ҳисобланади.
Ғалабани яқинлаштиришда Қозоғистоннинг ҳиссаси катта. 4 йил ичида 1,2 миллиондан ортиқ қозоғистонликлар қозоқ даштини тарк этган. Уларнинг ярми уйга қайтмаган.
Фронт ортида эса Қозоғистон ҳал қилувчи рол ўйнади. Хусусан, фронтда отилган ҳар ўн ўқдан тўққизтаси маҳаллий заводларда тайёрланди. 1500 вагон озиқ-овқат ва кийим-кечак жўнатилди. Енгил саноат 2 миллион аскарни кийим-кечак билан таъминлади.
78 касалхона ярадорларга ёрдам кўрсатди.
Халқ Мудофаа жамғармасига 4 миллион рублдан ортиқ пул ўтказди.
1945 йилда талабалар томонидан йиғилган маблағлар эвазига ташкил этилган танк колоннаси Берлин учун жангда қатнашди.
2025 йил 5 май ҳолатига кўра, Қозоғистонда 105 нафар Иккинчи жаҳон уруши қатнашчиси ва Ғалабага ҳисса қўшган бошқа тоифадаги 40 707 нафар фуқаро истиқомат қилади.
7 май куни Астанадаги “Қазақ ели” майдонида Ғалабанинг 80 йиллигига бағишланган ҳарбий парад Давлат раҳбари – Қозоғистон Қуролли Кучлари Олий Бош Қўмондони Қасим-Жомарт Тоқаев иштирокида Мустақил Қозоғистон армиясининг бугунги қудратини намойиш этди.
“Бу йил Ғалабанинг 80 йиллиги нишонланади! Барчага Ғалаба куни муборак бўлсин! Бу байрам халқимизнинг жанговар руҳи рамзидир. Юртимиз учун курашган мард аждодларимизни ҳурмат қиламиз. Ватанимиз ҳимоясида ҳалок бўлган мардлар хотирасига ҳурмат бажо келтирамиз. Тинчликни қўриқлаётган аскарларга ҳурмат бажо келтирамиз. Улуғ Ватан уруши бутун инсоният учун жуда оғир синов эди. Унинг оқибатлари кўплаб мамлакатлар, жумладан, Қозоғистон учун ҳам оғир бўлди. У кунлар уруш фақат бахтсизлик келтиришини кўрсатди ва бизга тинчлик бебаҳо хазина эканлигини англатди. Буюк Ғалаба тарихимизнинг ажралмас қисми ва бутун дунё учун буюк сабоқдир. Биз бу ҳақиқатни доимо ёдда тутишимиз керак”, – деди Давлат раҳбари.
Қасим-Жомарт Тоқаев шонли жангчилар қаҳрамонликнинг ажойиб намунасини кўрсатганини таъкидлади.
“Бу қозоқларнинг мард халқ эканлигини кўрсатди. 500 дан ортиқ аскаримиз Совет Иттифоқи Қаҳрамони бўлди. Талғат Бигелдинов, Сергей Луганский, Сағадат Нурмағамбетов, Иван Панфилов, Бауиржан Момишули, Нуркен Абдиров, Малик Ғабдуллин, Сабир Раҳимов, Маншук Маметова, Алия Молдагулова, Рахимжан Қошқарбаев, Хиуаз Доспанова ва бошқа кўплаб қаҳрамонлар ўчмас из қолдирди. Ватан меҳнаткашлари уруш йилларида фидойилик ва матонат кўрсатдилар. Қозоғистондан фронтга бир ярим минг вагон кийим-кечак ва озиқ-овқат жўнатилди. Юртимизга юзлаб корхоналар кўчирилди, кўплаб янги ишлаб чиқариш қувватлари барпо этилди. Улар жуда қисқа вақт ичида фронт учун керакли маҳсулотларни ишлаб чиқара бошладилар. Халқимиз кечаю кундуз тинмай меҳнат қилди, қурол-яроғ ва ўқ-дориларни тайёрлади, ҳарбий кийим тикди. Урушда отилган ўнта ўқдан тўққизтаси Қозоғистонда ишлаб чиқарилган. Буюк Ғалабани улуғлаш, энг аввало, мард қаҳрамонларимиз хотирасини абадий сақлаш демакдир. Ёш авлод уларнинг мардлиги, меҳнати ҳақида билиб улғайиши керак”, – деди Президент.
Бундан ташқари, Давлат раҳбари Буюк Ғалабанинг 80 йиллиги муносабати билан Астанадаги “Отан Ана” монументи пойига гул қўйиб, қозоғистонлик уруш фахрийлари руҳига ҳурмат бажо келтирди.
