Британиялик ўсмирларнинг ярми интернетсиз дунё ҳақида орзу қилади

ASTANA. Kazinform – 16 ёшдан 21 ёшгача бўлган британиялик ёшларнинг 46 фоизи ўз ёшлигини интернетсиз ўтказишни афзал кўрарди. Бу ҳақда The Guardian нашри социологик тадқиқот натижаларига таяниб хабар берди.

Социологларнинг аниқлашича, 16 ёшдан 21 ёшгача бўлган ёшларнинг деярли 70 фоизи ижтимоий тармоқларда вақт ўтказгандан кейин ўзини ёмонроқ ҳис қилади. Уларнинг 50 фоизи соат 22:00 дан сўнг айрим иловалар ва сайтларга киришни чекловчи “рақамли комендантлик соати”ни жорий этишни қўллаб-қувватлайди.

Тадқиқотда иштирок этганларнинг 25 фоизи кунига тўрт соатдан ортиқ вақтни ижтимоий тармоқларда ўтказишини тан олган. 42 фоиз ёшлар эса интернетда нима билан шуғулланаётгани ҳақида ота-онаси ёки васийларига ёлғон гапиришини маълум қилган.

Қизиғи шундаки, сўровномада қатнашганларнинг 27 фоизи интернетда ўзини бошқа одам сифатида кўрсатишини айтган. 40 фоиз респондент эса аноним аккаунтга эга эканини билдирган.

Тадқиқот Буюк Британия ҳукуматининг айрим ижтимоий тармоқларни маълум соатларда мажбурий ўчириш имкони ҳақидаги баёнотлари ортидан ўтказилган.