Биткоин нархи биринчи марта 100 000 долларга етди
ASTANA. Kazinform - 1 биткоиннинг нархи чоршанба куни биринчи марта 100 000 долларга етди, чунки криптовалюта учун илиқ муносабатда бўлган Дональд Трамп ғалабасидан кейин рақамли валютага бўлган талаб ўсишда давом этди, деб хабар беради Кazinform агентлиги NBC Newsга таяниб.
5 ноябрдан бери биткоин нархи 45% дан ортиқ ошди, йил бошидан эса қиймати икки баравар ошди.
Собиқ крипто скептик бўлган Дональд Трамп олтин ва нефть захиралари қаторида АҚШ биткоинининг “стратегик захирасини” яратишга қизиқиш билдирган. Учинчи президентлик пойгасида у Теннесси штатининг Нэшвилл шаҳрида бўлиб ўтган Биткоин конференциясида крипто ҳамжамиятини инновациялари учун мақташ ва сайланса, АҚШни дунёнинг крипто пойтахтига айлантиришга ваъда бериш учун қатнашди.
Бироқ, криптовалюталар мунозарали бўлиб қолмоқда: уларнинг кўплари, шу жумладан биткоиннинг ўзи, ФҚБ маълумотларига кўра, ўтган йили истеъмолчиларга миллиардлаб доллар зарар келтирган кибержиноят ва фирибгарликнинг ўсишига ҳисса қўшган. Бу АҚШ федерал регуляторларини криптовалютанинг кўплаб ҳаракатларига шубҳа билан қарашга олиб келди.
Сайловдан сўнг, биткоин тарафдорлари янги маъмурият рақамли токенларни қаттиқ тартибга солиш ва қўллашни тўхтатади, анъанавий молиявий институтлар учун биткоин сармоясини очиб беради ва энергия ишлаб чиқаришни кўпайтириш орқали биткоин ишлаб чиқаришни янада фойдали қилади, деб умид қилмоқда.
Ҳозирги вақтда биржа фондлари битcоин нархини кузатиб боради, улар «ETF iShares Bitcoin Trust» ва «BlackRock» каби йирик молиявий институтлар томонидан бошқарилади.
«BlackRock» АҚШнинг тематик ва фаол ETF компанияси раҳбари Жей Жейкобснинг таъкидлашича, «ETF IBIT» 2024 йил январь ойида ишга туширилганидан бери қиймати 45 миллиард долларгача ўсган ва ўтган ойда унинг қиймати 4,1 миллиард долларга ошган.
Ж. Жейкобснинг сўзларига кўра, бутун дунё бўйлаб турли бойлик даражасидаги сармоядорлар тобора кўпроқ биткоинни геосиёсий хатарлардан, хусусан, инфляция туфайли юзага келадиган валюта девальвациясидан ҳимоя қилувчи восита сифатида кўра бошлайдилар.
Эслатиб ўтамиз, биткоин 96 минг доллардан ошгани ҳақида хабар берган эдик.
Муаллиф: Рустем Қожибаев
