Беларусь электрон виза тизимини жорий қилди

ASTANA. Kazinform — Беларусда 67 та давлат фуқаролари учун электрон виза тизими жорий этилади. Бу ҳақда Синьхуа агентлиги хабар берди.

Бу пайшанба куни Беларусь миллий ҳуқуқий интернет-порталида расман эълон қилинган Вазирлар Кенгаши қарорида кўзда тутилган. Янги қарор эълон қилинганидан кейин уч ой ўтгач кучга киради.

Қарорга мувофиқ, электрон визалар “Консул” автоматлаштирилган тизимида расмийлаштирилмоқда.

Электрон визалар АҚШ, Канада, Австралия, Япония, Австрия, Янги Зеландия, Бельгия, Буюк Британия, Испания, Латвия, Литва, Польша каби 67 та давлатнинг доимий паспорти эгаларига берилади. Бундай визани олиш учун Беларусия электрон хизматларнинг ягона порталидаги шахсий кабинетга мурожаат қилиш керак. Ариза етти календарь кун ичида кўриб чиқилади. Электрон визалар шошилинч равишда берилмайди.

Бир марталик ва индивидуал электрон визалар 30 кундан ортиқ бўлмаган муддатга берилади. Сафарнинг мақсадига қараб қуйидаги тоифадаги визалар берилади: хизмат сафари, спорт, маданий, илмий, маърифий тадбирлар ва амалиётларда қатнашиш, шахсий ишлар, туризм.