Баҳодир Жалолов ва Отабек Холматов АҚШга етиб борди ва машғулотларга киришди
TASHKENT. Kazinform - Икки карра Олимпиада чемпиони, ўзбекистонлик Баҳодир Жалолов 6 февраль куни Канаданинг Монреаль шаҳрида ташкил этиладиган профессионал бокс оқшомида ўзининг навбатдаги жангини ўтказади, деб хабар беради Kazinform агентлиги ЎР профессионал бокс федерациясига таяниб.
Унга ўша куни франциялик Дэвид Спильмонт рақиблик қилади. Ўзбекстонлик чарм қўлқоп устаси Артур Биярсланов ва Моҳамед Мимун ўртасидаги марказий жангнинг андеркардида иштирок этади. Жалолов жангига икки ҳафтадан сал кўпроқ вақт қолган бир пайтда АҚШга етиб борди.
Баҳодир билан бирга яна бир ўзбекистонлик профессионал боксчи Отабек Холматов ҳам Индиога етиб борди ва у ҳам машғулотларга киришди. Ҳозирча Холматовнинг жанги бўйича ҳеч қандай маълумот йўқ. Яқинда ярим енгил вазн тоифасидаги боксчининг америкалик Раймон Фордга қарши ўтказган жанги The Ring талқини бўйича 2024 йилнинг энг яхши жанги деб топилганди. Холматов WBA камари учун кечган ўша жангда очколар ҳисобида олдинда бора туриб, сўнгги сонияларда техник нокаут эвазига аламли мағлубиятни қабул қилиб олганди. Отабек айнан Форд билан реванш жангини ўтказиш ниятида.
Маълумот ўрнида, Баҳодир Жалолов профессионал фаолияти давомида ҳозирга қадар 14 та жанг ўтказиб, уларнинг барчасида ғалаба қозонган. Сўнгги жангини 2023 йил 17 ноябрь куни Тошкентда ЖАР вакили Крис Томпсонга қарши ўтказиб, илк раунддаёқ нокаут орқали зафар қучганди. Унинг бўлажак рақиби Дэвид Спильмонт эса шу кунгача 25 та жанг ўтказиб, 16 ғалаба, 8 мағлубият ва 1 та дуранг қайд этган. Ғалабаларининг 11 тасини нокаут орқали қўлга киритган.
Эслатиб ўтамиз, аввалроқ Баҳодир Жалолов 6 февраль куни Канадада жанг қилиши ҳақида хабар берган эдик.
