БАА қонунлар яратишда сунъий интеллектдан фойдаланадиган биринчи давлатга айланади
ABU DHABI. Kazinform - Янги тизим кенг кўламли маълумотлардан фойдаланган ҳолда қонунларнинг аҳоли ва иқтисодиётга кундалик таъсирини кузатиш имконини беради, деб хабар беради Kazinform агентлиги мухбири.
Бирлашган Араб Амирликлари қонунчиликни ишлаб чиқиш ва қайта кўриб чиқишда сунъий интеллект иштирок этадиган дунёдаги биринчи тизим ишга туширилганини расман эълон қилди, деб хабар бермоқда Амирлик ОАВлари.
Янги тизим мамлакатнинг рақамли трансформацияси бўйича кенгроқ ҳукумат стратегиясининг бир қисмига айланади. АI нафақат федерал ва маҳаллий қонунларни тайёрлашда, балки суд қарорларини шакллантириш, ижро жараёнларини тартибга солиш ва давлат хизматларини кўрсатишда ҳам қўлланилиши кутилмоқда, деб ёзади Financial Times.
Ушбу йўналишни мувофиқлаштириш учун ўтган ҳафтада БАА Вазирлар кабинети қонун ижодкорлигидаги рақамли жараёнларни амалга ошириш ва назорат қилиш учун масъул бўлган янги орган – Тартибга солувчи разведка бошқармасини тузди.
— Бу тизим қонун ижодкорлигига бўлган ёндашувимизни ўзгартиради: жараён тезроқ, аниқроқ ва натижага йўналтирилган бўлади, — деди БАА вице-президенти ва Дубай ҳукмдори Шайх Муҳаммад бин Рашид Ал Мактум.
Расмийлар ҳуқуқий тартибга солишда сунъий интеллектдан фойдаланиш амалдаги конституциявий нормалар доирасида ҳамда шаффофлик ва ҳисобдорликнинг барча тамойилларига риоя қилган ҳолда амалга оширилишини таъкидламоқда.
БАА ҳукумати прогнозларига кўра, 2030 йилга бориб сунъий интеллектнинг жаҳон иқтисодиётига қўшган ҳиссаси 15,7 триллион долларга етиши мумкин, бу БАА ялпи ички маҳсулотини 35 фоизгача оширади, шунингдек, давлат харажатларини икки баробарга қисқартиради.
Ҳуқуқшунос ва қонун чиқарувчи Ҳишам ал-Рифаи тушунтирганидек, ташаббус нафақат рақамлаштиришни, балки қонунларни яратиш механизмини қайта кўриб чиқишни ҳам ўз ичига олади.
—Йиллар давомидаги сиёсий мунозараларнинг анъанавий модели ўрнига энди қонунлар маълумотлар, мантиқ ва реал муаммолар таҳлилига асосланган ҳолда яратилади, — деди у.
Унинг сўзларига кўра, сунъий интеллект суд амалиётидаги камчиликларни аниқлашга, илғор жаҳон тажрибасини таҳлил қилишга ва аҳолининг кўп миллатли таркибини ҳисобга олган ҳолда мослаштирилган ечимларни таклиф қилишга қодир.
— Аҳолининг атиги 10 фоизи БАА фуқаролари бўлган мамлакатда қонунлар ҳамма учун тушунарли бўлиши муҳим. Бу уларни оддий, тушунарли тилда, араб, инглиз ва бошқа тилларда ёзишни англатади, — деди ар-Рифаи.
Амирлик сиёсатшуноси Абдулхолиқ Абдулланинг сўзларига кўра, бу ташаббус БААнинг АI ва рақамли иқтисодиётнинг глобал марказига айланиш борасидаги узоқ муддатли интилишларини акс эттиради, худди мамлакат аллақачон глобал логистика ва молиявий марказ сифатида ўзини намоён қилган.
Эслатиб ўтамиз, аввалроқ Россияда сунъий интеллект ёрдамида фирибгарларни ушлагани ҳақида хабар берган эдик.
Муаллиф: Арсен Ўтешев
