Атирау вилоятида қорамол ва паррандалар сони ортди
ATYRAÝ. Kazinform – Атирау вилоятида жорий йилда қорамоллар сони 223,8 минг бошдан ошди. Бу ҳақда Атирау вилояти ҳокими Серик Шапкенов Марказий коммуникациялар хизмати брифингида маълум қилди, дея хабар беради Kazinform агентлиги мухбири.
“Йил бошидан буён 95,6 миллиард тенгелик қишлоқ хўжалиги маҳсулотлари етиштирилди. Жорий йилда вилоят фермерлари 10,3 минг гектар майдонга ғалла экишни режалаштирган. Афсуски, сув тошқинлари оқибатида бор-йўғи 5,3 минг гектар майдонга экин экилди. Қувонарлиси, жорий йилда вилоятимизда қорамоллар сони кўпайиб, 223,8 минг бошдан ошди. Айтишимиз мумкинки, паррандалар сони ҳам икки баравар кўпайди - 2023 йилда - 79 минг бош, 2024 йилда - 195 минг бош. Умуман олганда, жорий йилда қишлоқ хўжалигини ривожлантириш йўналишида учта инвестиция лойиҳаси амалга ошириляпти. Натижада 90 та иш ўрни яратилди. Келгуси йилда умумий қиймати 26,2 миллиард тенге бўлган тўртта лойиҳани амалга ошириш режалаштирилган. Натижада 187 та иш ўрни яратилади, – дейди С.Шапкенов.
Вилоят ҳокими «Ауыл аманаты» миллий лойиҳаси доирасида амалга оширилаётган ишлар ҳақида ҳам гапирди.
Мазкур лойиҳа кичик ва ўрта бизнеснинг ўзига хос ғояларини амалга ошириш имконини берди. Жорий йилда ушбу мақсадлар учун вилоят бюджетидан 761 миллион тенге маблағ ажратилиб, 83 лойиҳа амалга ошириляпти.
“Лойиҳалар қишлоқ жойларда янги иш ўринлари яратишга ёрдам беради ва улар аҳоли даромадларини ошириш, ҳамда вилоят иқтисодиётини мустаҳкамлашга қаратилган. Лойиҳаларнинг 50 таси чорвачиликни ривожлантиришга, 30 таси кичик ва ўрта бизнесни қўллаб-қувватлашга, 3 таси қишлоқ хўжалигини ривожлантиришга қаратилган”, — деди ҳоким.
