Астанадаги саммитда жаҳон тараққиётининг янги модели тақдим этилди – ўзбекистонлик эксперт
ТASHKENT. Кazinform — Қозоғистон ташаббуси билан ишлаб чиқилган “Адолатли дунё, келишув ва тараққиёт йўлида жаҳон бирлиг тўғрисида” концепцияси адолатли дунё тартибини ўрнатиш учун зарур шарт-шароитларни тўлиқ қамраб олади. Бундай фикрни таниқли ўзбекистонлик эксперт, “Маъно” тадқиқот ташаббус маркази директори Бахтиёр Эргашев билдирди, деб хабар беради Kazinformнинг Ўзбекистондаги мухбири Алихан Асқар.
“Президент Қасим-Жомарт Тоқаев ШҲТ Қозоғистон раислигига ўтган пайтда глобал ўзгаришлар даврида ривожланишнинг янги тартиби ва асосларини шакллантиришга қаратилган ташаббусларни қабул қилувчи ташкилотга айланиши кераклигини маълум қилди. Ўшандан бери Қозоғистон раҳнамолигида “Адолатли дунё, келишув ва тараққиёт йўлида жаҳон бирлиги тўғрисида”ги жуда муҳим ҳужжат ишлаб чиқилди. Унда ШҲТнинг ёндашуви ва бугунги кунда бутун инсониятни ташвишга солаётган муаммоларни ҳал қилиш йўллари баён этилган. Ҳужжат, хусусан, хавфсизлик муаммолари, адолатли ва янги дунё тартибини ўрнатиш, янги мустамлакачилик тизимидан тўлиқ халос бўлиш учун зарур шарт-шароитларни ўз ичига олган. ШҲТга аъзо барча давлатлар буни қўллаб-қувватламоқда”, - деди эксперт.
Бундан ташқари, Бахтиёр Эргашев Давлат раҳбари Қасим-Жомарт Тоқаев томонидан илгари сурилган ШҲТ доирасида йирик иқтисодий лойиҳаларни биргаликда амалга ошириш таклифини алоҳида таъкидлади.
Унинг фикрича, хавфсизлик масалаларидан ташқари, аъзо давлатларнинг иқтисодий ҳамкорликни кучайтиришга интилиши жадал ривожланишга замин яратади.
Шанхай ҳамкорлик ташкилоти дунёнинг энг йирик иқтисодига эга бўлган учта давлат - Россия, Ҳиндистон ва Хитойдан иборат.
Бундан ташқари, ташкилот таркибига Покистон ва Эрон каби жуда нуфузли минтақавий кучлар киради.
Шу боис экспертнинг фикрича, бу имкониятдан унумли фойдаланиб, ШҲТ нуфузи ва салмоғини ошириш муҳим.
“Астанадаги саммитда жаҳон ҳамжамиятига глобал тараққиётнинг янги модели тақдим этилди. Бундан ташқари, ШҲТ фаолияти Евроосиё маконида иқтисодий ва сармоявий ҳамкорликнинг янги архитектурасини шакллантиришга қаратилган. Бу ҳеч қандай блок ташкилотига қарши эмас, балки адолатли дунё тартибини ўрнатишга ҳаракат қилаётган уюшмадир”, - дейди Бахтиёр Эргашев.
Сиёсатшунос таъкидлашича, Ғарб давлатларининг глобал тартиб ўрнатишдаги таъсири даври якунланмоқда. Шунинг учун ҳам дунёни адолатга чорлайдиган, замон талабига мос суръат берадиган тамойиллар зарур.
Шу муносабат билан ШҲТ ушбу вазифаларни шараф билан бажариб келмоқда. Бахтиёр Эргашев Қозоғистон раислиги ташкилотнинг айрим йўналишлардаги фаолиятини изчил жонлантирганини таъкидлади.
“ШҲТ жаҳон майдонига дадил ташаббуслар билан чиқиши керак. Ташкилот бунга қодир, чунки у ривожланишнинг турли босқичларини босиб ўтган ва камолотга эришган. Шанхай ҳамкорлик ташкилоти келажакда янги глобал тартиб ўрнатадиган иттифоқни акс эттиришига катта ишонч бор”, — дея хулоса қилди Бахтиёр Эргашев.
Эслатиб ўтамиз, Астана шаҳрида Шанхай ҳамкорлик ташкилотига аъзо давлатлар раҳбарларининг учрашуви бўлиб ўтди ва унда 25 та муҳим ҳужжат имзоланган эди.
