Астанада Халқаро Оролни қутқариш жамғармаси бошқарувининг биринчи йиғилиши бўлиб ўтди
ASTANА. Кazinform – ҚР Бош вазири ўринбосари Қанат Бозимбаев раислигидаги тадбирда Қозоғистон Сув ресурслари ва ирригация вазири Нуржан Нуржигитов, ХОҚЖ(Халқаро Оролни қутқариш жамғармаси) Ижроия қўмитаси раиси Асхат Оралбай, Тожикистон Бош вазири ўринбосари Сулаймон Зиёзода, Туркманистон Вазирлар кабинети раисининг ўринбосари Тангриқули Атахаллиев, Ўзбекистон Республикаси Президенти маслаҳатчиси Шуҳрат Ғаниев, Қирғизистон Республикасининг Қозоғистондаги Фавқулодда ва Мухтор Элчиси Дастан Дюшекеев иштирок этди.
Халқаро Оролни қутқариш жамғармаси 1993 йилда ташкил этилган ва Марказий Осиёдаги асосий минтақавий органлардан бири ҳисобланади. Қозоғистон ХОҚЖга 2026 йилгача раисликни ўз қўлига олди ва бугун жамғарма бошқарувининг биринчи йиғилишини ўтказди.
“ХОҚЖ Марказий Осиёнинг ижтимоий-иқтисодий фаровонлигига таъсир кўрсата оладиган минтақавий ҳамкорликнинг кучли коллектив воситасига айланди. ХОҚЖ доирасидаги яқин ҳамкорлик ва давлат раҳбарларининг сиёсий иродаси туфайли жамғарма Орол инқирози билан боғлиқ кенг кўламли муаммоларни ҳал қилишда мамлакатларимиз саъй-ҳаракатларини бирлаштиришга муваффақ бўлди. Ишончим комилки, Бошқарувнинг жорий йиғилиши мамлакатларимиз саъй-ҳаракатларига қўшимча туртки беради. Орол денгизи ҳавзасининг сув-энергетика ресурсларидан ўзаро манфаатли фойдаланишнинг узоқ муддатли механизми зарур. Шунингдек, Сирдарё ва Амударё ҳавзаларида энергетика ва ирригация манфаатларини ҳисобга олган ҳолда сув ҳавзаларининг иш режимлари бўйича келишилган ҳаракатларни таъминлаш зарур. Сув ва энергетика ходимларининг бевосита ўзаро ҳамкорлиги иқлим шароитида, яъни сув тошқинлари ва қурғоқчилик даврида келишилган қарорлар қабул қилиш имконини беради”, — деди ҚР Бош вазири ўринбосари Қанат Бозимбаев ўз нутқида.
Йиғилиш давомида Қозоғистон томони Иш режасини тақдим этди. Ҳужжат таъсисчи давлатлар раҳбарлари ва ХОҚЖ Президенти топшириқларини амалга ошириш ва жамғарманинг ташкилий тузилмаси ва шартнома-ҳуқуқий базасини такомиллаштиришга қаратилган 10 та йўналиш ва 40 дан ортиқ чора-тадбирлардан иборат.
Иккита йирик лойиҳани амалга ошириш: Орол денгизи ҳавзаси мамлакатларига ёрдам кўрсатиш бўйича ҳаракатлар дастури, унинг доирасида минтақада 35 та лойиҳа амалга оширилмоқда ва Марказий Осиёда барқарор ривожланиш учун атроф-муҳитни муҳофаза қилиш бўйича минтақавий дастурни янада ривожлантириш устувор деб ҳисобланади.
