Америкада «Титаник»ни кўрмоқчи бўлган яна бир сайёҳ пайдо бўлди

Америкалик кўчмас мулк миллиардери ва денгиз тадқиқотчиси Ларри Коннор «Титаник»ни ўрганиш учун сув остига саёҳат қилишни режалаштирмоқда.

Ларри Коннор ва «Triton Submarines» асосчиларидан бири Патрик Лаҳей Шимолий Атлантика океанида ҳалокатга учраган «Титаник» кемаси қолдиқларини кўриш учун тахминан 3800 метр чуқурликка саёҳат қилмоқчилигини маълум қилди. Миллиардерлар саёҳат ташкилот томонидан тўлиқ сертификатлангандан кейин бошланишини айтган.

Саёҳатчилар «4000/2 Abyssal Explorer» деб номланган кичик кемадан фойдаланишни режалаштирмоқда.

Ўтган йили «OceanGate» томонидан яратилган кема «Титаник» томон кетаётганда портлаб кетиб, 5 киши ҳалок бўлганди. Ушбу фожиада «OceanGate» компаниясининг 61 ёшли ижрочи директори Стоктон Раш ҳаётдан кўз юмганди.

Ушбу ҳалокатдан кейин сув ости саёҳати саноати инқирозга юз тутиб, одамларда қўрқув пайдо бўлди. Кейинроқ кема раҳбари баъзи хавфсизлик қоидаларга риоя этмагани маълум қилинди. Ҳозирда АҚШ ва Канада расмийлари томонидан терговлар давом этмоқда.