АҚШ барча пўлат ва алюминий импортига божлар жорий этади
АҚШ президенти Дональд Трамп қўшнилари ва дунё билан савдо урушида янги қадам ташлади: у душанба куни АҚШнинг барча алюминий ва пўлат импортига 25 фоизлик тариф эълон қилишини, бир-икки кундан кейин эса Америка маҳсулотларига божлар жорий қилган мамлакатлар импортига тарифлар жорий этишини айтди.
Трамп журналистларга Флоридадаги мулкидан Нью-Орлеандаги Миллий футбол лигаси финалига йўл олган самолётда бу режалар ҳақида гапириб берди.
АҚШга энг йирик пўлат етказиб берувчилар қўшни Мексика ва Канададир ва Қўшма Штатлар энг кўп алюминийни Канададан импорт қилади.
Трамп ўзининг биринчи муддатида Канада, Мексика ва Европа Иттифоқидан пўлатга 25 фоиз, алюминийга эса 10 фоиз божлар жорий қилди.
Кейин, бир йил ўтгач, Қўшма Штатлар Мексика ва Канада билан ушбу тарифларни бекор қилиш бўйича келишувга эришди. Европа металларига божлар 2021 йилгача кучда қолди.
Бир неча кун олдин Трамп Канада ва Мексикадан импорт қилинадиган барча маҳсулотларга 25 фоизлик божлар жорий этилишини эълон қилган, бироқ бу давлатлар раҳбарлари билан суҳбатлашганидан сўнг уларни амалга оширишни 30 кунга кечиктиришга рози бўлган.
Трамп, шунингдек, Хитой импортига 10 фоизлик божлар жорий қилди. Хитой бунга жавобан баъзи Америка товарларига янги тарифлар киритди.
