АЭС корхоналарга янги иш ўринлари яратиш имконини беради
SHYMKENT. Кazinform – АЭС қурилишини қўллаб-қувватлаш бўйича Халқ штабининг ҳудудларда халқ билан учрашувлари давом этмоқда. Бугун Чимкент шаҳрида штаб аъзолари атом электр станциясининг афзалликлари ҳақида сўз юритди.
Учрашув мамлакатдаги етакчи техник олий таълим муассасаларидан бири бўлган М.Ауезов номидаги Жанубий Қозоғистон университети талабалари билан учрашувдан бошланди. Таълим муассасаси ўқувчилари бир қатор техник мутахассисликлар бўйича таълим оладилар, шунингдек, илмий изланишлар олиб борадилар. Бўлажак муҳандислар Атом электр станцияси ғоясининг мамлакатни янада ривожлантириш ва ишлаб чиқариш соҳасида янги мультипликатив имкониятлар яратиш йўлидаги барча истиқболларини яхши тушунади. Шу боис, йиғилишда талабалар, ёш олимлар, ёшлар ташкилотлари фаоллари АЭС қуриш ғоясини тўлиқ қўллаб-қувватлашини билдирди.
Мажилис спикери, «AMANAT» партияси раиси Ерлан Қошанов АЭС иқтисодиёт, саноат, таълим ва илм-фан ривожига янги суръат бағишловчи ғоят муҳим лойиҳа эканини таъкидлади. Атом электр станцияси турли хавф-хатарларнинг олдини олади ва мамлакатни қудратли энергетика базасига эга илғор давлатлар қаторига қўяди.
“Атом электр станциясини қуриш бир куннинг иши эмас. Лойиҳани амалга ошириш ўн йил ёки ундан ҳам кўпроқ вақтни олади. Иқтисодиёти ривожланган, келажаги порлоқ, қудратли ва мустақил Қозоғистонда яшашни барчангиз хоҳлаётганингизга шубҳа йўқ. Давлат раҳбари Қасим-Жомарт Тоқаев ҳам ана шу мақсадни кўзламоқда. Ҳозир қилинаётган ишлар, биринчи навбатда, сиз учун қилинмоқда. Шундай экан, дадил қарор қабул қилиш вақти келди. Дадил қарорлар қабул қиладиганлар эса ёшлардир! Агар шундай бўлса, сизлар бўлажак референдумда АЭС қурилишини қўллаб-қувватлаб, ўз келажагингиз учун тўғри танлов қилишингиз керак”, – деди Ерлан Қошанов ёшларга қилган нутқида.
Суҳбат чоғида Халқ штаби аъзолари АЭС қурилиши ёшларга кенг имкониятлар яратишини таъкидладилар. Хусусан, юқори малакали, муносиб иш ҳақига эга ўн минглаб янги иш ўринлари яратилади. Қозоғистондаги олий ўқув юртлари битирувчилари атом электр станциялари қурилишида иштирок этиш ва маҳаллий атом саноатида хизмат қилиш учун барча зарур имкониятларга эга. Келгусида атом энергетикасини ривожлантириш бўйича тегишли давлат дастури ишлаб чиқилиб, унда атом электр станциялари эҳтиёжларидан келиб чиққан ҳолда махсус кадрлар тайёрлашга алоҳида эътибор қаратилади.
Шаҳар ёшлари номидан Энергетика ва ноанъанавий энергия тизимлари кафедрасининг PhD доктори Нурсултан Файз, ёш олим Исабек Азимхан, ёшлар маркази директори Ақан Бесбаев, Талабалар парламенти раиси Сабина Сағинтай АЭСни қўллаб-қувватлаш бўйича ўз фикрларини билдирдилар. Улар Қозоғистон тараққиётдан четда қола олмаслиги, шунинг учун нафақат энергия билан таъминлайдиган, балки мамлакат илм-фан ва технологиясини янги босқичга кўтарадиган, ёшлар учун янги имкониятлар яратадиган АЭС керак, деган фикрни билдирдилар.
Шундан сўнг АЭС қурилишини қўллаб-қувватлаш Халқ штабининг аъзолари зиёлилар вакиллари билан учрашди. Тадбир давомида Қозоғистонда атом энергетикасини ривожлантириш истиқболлари ва 6 октябрь куни бўлиб ўтадиган миллий плебисцитда АЭСни қўллаб-қувватлаш бўйича тўғри қарор қабул қилиш муҳимлиги муҳокама қилинди. Суҳбат чоғида фуқароларни референдумда иштирок этишга сафарбар этиш зарурлигига алоҳида эътибор қаратилди. Халқ штаблари жамиятда катта обрў-эътиборга эга бўлган зиёлиларнинг иштирок этиши мамлакат мустақиллигини янада мустаҳкамлашга хизмат қиладиган АЭСнинг аҳамиятини одамларга тўғри етказиш имконини беришига ишонади.
Шу куни штаб аъзолари «Тассай» саноат зонасида бўлиб, тадбиркорлар, меҳнат жамоалари билан учрашди. Улар АЭС қурилса, мамлакатнинг иқтисодий аҳволи қандай ўзгаришини айтишди. Хусусан, узоқ муддат фойдаланиш мумкин бўлган бундай станция корхоналар учун жуда муҳим бўлган электр энергиясининг барқарор ва арзон тарифини таъминлайди. Ушбу қадам завод ва фабрикаларнинг ишлаб чиқариш харажатларини камайтириш ва уларнинг самарадорлигини ошириш имконини беради.
Шунингдек, штаб аъзолари ишбилармонларга Қозоғистон 2060 йилгача углерод нейтраллиги бўйича мажбурият олганини эслатди. Яъни, кўмир технологияси бўйича ишлаб чиқарилган барча маҳсулотлар жаҳон бозорида қўшимча солиққа тортилади. Электр энергиясининг 70 фоизини кўмир заводларидан оладиган Қозоғистон учун бу жиддий тўсиқ бўлиши мумкин. Шу боис Қозоғистон маҳсулотларининг халқаро миқёсда рақобатбардошлигини оширишда АЭС қурилиши стратегик аҳамиятга эга.
Йиғилиш якунида тадбиркорлар ва меҳнаткашлар бўлажак референдумда фаол иштирок этишга ва АЭСни қўллаб-қувватлашга тайёр эканликларини билдирдилар. Уларнинг фикрича, атом энергетикасининг ривожланиши Қозоғистоннинг энергетик мустақиллигини таъминлабгина қолмай, балки мамлакатга илғор технологияларни жорий этиш, хорижий сармояларни кўпроқ жалб қилиш, ишлаб чиқариш ҳажмини ошириш ва янги иш ўринлари яратиш имконини беради.
