8,7 магнитудали: Камчатка тарихидаги энг кучли зилзила қайд этилди

ASTANА. Кazinform — Камчаткадаги зилзила магнитудаси, турли ҳисоб-китобларга кўра, 8,7 баллга етган. Бу 1952 йилдан бери содир бўлган энг кучли зилзила бўлди, деб хабар берди ТАСС.

— 1952 йилдан бери энг кучли зилзила ҳозиргина Камчатканинг сейсмофокал зонасида қайд этилди. Турли ҳисоб-китобларга кўра, магнитудаси 8,7 га тенг. Бу, шубҳасиз, ўта муҳим ҳодисадир, — деб хабар берди Россия Фанлар академиясининг Бирлашган геофизика хизматининг Камчатка бўлими ўзининг Теlegram-каналида.

Зилзила эпицентри жануби-ғарбда 2025 йил 20 июль ва 2024 йил 17 августдаги зилзилалар эпицентрлари билан чегарадош. Зилзила чуқур денгиз хандақи бўйлаб жануби-ғарбий йўналишда камида 200 километрга тарқалди.

Олимлар ушбу сейсмик ҳодисани классик субдукция зилзиласи (литосфера плиталарининг бир-бирининг остига силжиши натижасида юзага келган) сифатида баҳоламоқда ва кутилмаган оқибатлар бўлмаслигини башорат қилмоқда. Дастлабки ҳисоб-китобларга кўра, Петропавловск-Камчатскийда зилзила кучи камида 6 баллга етган.

Камчатка соҳиллари яқинида ва Северо-Курилск шаҳрида хавфли, кучли цунами қайд этилди.

Камчаткада маҳаллий вақт билан 11:26 да (Москва вақти билан 02:26) кучли зилзила содир бўлди.

Вилоят раҳбари қарори билан Петропавловск-Камчатскийда иш куни қисқартирилди. 1-сонли шаҳар болалар поликлиникаси биносига шикаст етганлиги сабабли унинг иши вақтинча тўхтатилди.

Шаҳарда тирбандликлар, ёқилғи қуйиш шохобчаларида узун навбатлар пайдо бўлди, электр ва мобил интернет узилиб қолди. Кўплаб аҳоли кўчаларга югурди.

Бугун эрталаб Камчаткада содир бўлган кучли зилзиладан сўнг бир неча киши шифокорларга мурожаат қилган.

Камчатка ўлкаси соғлиқни сақлаш вазири Олег Мельниковнинг сўзларига кўра, жабрланганларнинг ҳаммасининг аҳволи қониқарли.