4 миллиард долларлик можаро: Калифорния Трамп маъмуриятини судга берди
WASHINGTON. Kazinform – Калифорниянинг Юқори тезликдаги темир йўллар бошқармаси Сан-Франциско ва Лос-Анжелес шаҳарлари ўртасидаги юқори тезликдаги темир йўл (ЮТТЙ) лойиҳасини молиялаштиришдан бош тортгани учун Дональд Трамп маъмуриятини судга берди. Бу ҳақда Reuters агентлиги хабар берди, деб ёзади ТАСС.
Гап федерал бюджетдан ажратилиши керак бўлган 4 миллиард доллар ҳақида бормоқда. Лойиҳага масъул муассаса ушбу қарорни “асоссиз ва ихтиёрий ваколат суиистеъмоли” сифатида баҳолаб, АҚШнинг Лос-Анжелесдаги округ судига даъво аризаси киритди.
Калифорния губернатори Гэвин Ньюсомнинг сўзларига кўра, АҚШ Транспорт вазирлиги мазкур қарорни Бейкерсфилд ва Мерсед шаҳарлари ўртасидаги магистраль йўлнинг биринчи бўлагини қуриш ишлари қизғин давом этаётган пайтда қабул қилган. Ньюсом федерал молиялаштиришни тўхтатилишини “Президент Трампнинг Калифорния ва юқори тезликдаги темир йўл лойиҳасига нисбатан шахсий фикри билан боғлиқ майда сиёсий интиқом” деб атади ва бу қарор ҳақиқий фактларга эмас, шахсий муносабатларга асосланганини таъкидлади.
Аввалроқ Дональд Трамп 2008 йили ўша пайтдаги губернатор Арнольд Шварценеггер ташаббуси билан бошланган Калифорниянинг ЮТТЙ лойиҳасини федерал бюджет ҳисобидан молиялаштиришни тўхтатишини эълон қилган эди. У лойиҳа харажатларининг ортиб бориши ва амалга ошириш муддатининг чўзилишига танқид билан чиққан.
“Мен АҚШнинг солиқ тўловчи меҳнаткаш фуқароларига мамнуният билан хабар қиламан: расман барчангизни Калифорниядаги “ҳеч қаерга олиб бормайдиган қимматбаҳо тезкор поезд” лойиҳасини молиялаштиришдан озод қиламан”, – деган эди Трамп.
Унга кўра, Транспорт вазири Шон Даффининг ҳаракатлари туфайли федерал долларлардан бир цент ҳам энди бу “алоҳида манфаатдорликка асосланган лойиҳа”га ажратилмайди.
Ўз навбатида, АҚШ Транспорт вазири Трамп маъмурияти ЮТТЙ бекор қилинишига қарши ҳар қандай даъвони рад этишга тайёр эканини билдирди.
Айни пайтда лойиҳа доирасида 50 га яқин инфратузилма иншоотлари, жумладан кўприклар ва йўл ўтказгичлар қурилган. Бутун темир йўл тармоғининг умумий узунлиги 1 249 км бўлиши режалаштирилган. Унга кўра, поездлар соатига 350 кмдан ортиқ тезликда ҳаракатланиши кутилмоқда.
