27 октябрда Ўзбекистонда парламент сайловлари бўлиб ўтади
TASHKENT. Kazinform - Ўзбекистон Марказий сайлов комиссияси 27 октябрда парламент ва маҳаллий Кенгашлар депутатлари сайловини ўтказиш тўғрисида қарор қабул қилди, деб хабар берди Kazinform агентлигининг Тошкентдаги мухбири Алихан Асқар.
Сайловолди ташвиқоти бугун, 26 июлдан бошланади.
Эслатиб ўтамиз, бунгача Ўзбекистонда парламент ваколатларини ўзгартиришга қаратилган қонун қабул қилинган эди.
Ҳужжатга кўра, парламент палаталарининг бир-бирини такрорлайдиган ваколатларига аниқлик киритилди. Энди сенаторларнинг умумий сони 100 нафардан 65 нафарга қисқартирилади. Бунда ҳар бир маъмурий ҳудуддан 4 нафар сенатор сайланади, қолган 9 нафар депутат эса президент томонидан тайинланади.
Шунингдек, Қонунчилик палатаси Спикерининг ўринбосарлари сони 7 нафардан 2 нафарга қисқартирилади. Улар ўз ваколатлари даврида фракция таркибига кирмайди ва сиёсий партияга аъзоликни тўхтатади.
Ҳужжатга кўра, Қонунчилик палатаси ва Сенатга ўзини-ўзи тарқатиш ҳуқуқи берилган. Бунда Қонунчилик палатасига янги сайлов 2 ой ичида, Сенатнинг янги таркиби эса бир ой муддатда ўтказилиши керак.
Эндиликда Ўзбекистонда бир шахс кетма-кет икки муддатдан ортиқ Бош прокурор лавозимига тайинланиши мумкин эмас. Бундай тақиқ Сенат Раиси ва Қонунчилик палатаси Спикерига ҳам тегишли. Илгари уларнинг амал қилиш муддати чегараланмаган эди.
Шу билан бирга, Сенат ваколатларининг бир қисми парламент Қонунчилик палатасига ўтади. Хусусан, у Бош вазир лавозимига номзодни келишиш ва тасдиқлаш, Вазирлар Маҳкамаси аъзоларини тасдиқлаш, Давлат бюджети ижросини назорат қилиш, Ҳисоб палатасининг ҳисоботини ва бошқа ҳужжатларни кўриб чиқишни ўз ичига олади.
Ўз навбатида, парламентнинг юқори палатаси Президент тақдимномасига кўра Конституциявий суд ва Олий суд, Олий судялар кенгаши ва бошқа идоралар раисларини сайлайди. Бундан ташқари, Сенат давлат раҳбарининг идораларни ташкил этиш ва тугатиш тўғрисидаги фармонларини ҳам тасдиқлаши мумкин.
Жорий йилда бўлиб ўтган парламент сайлови якунларига кўра, Сенатнинг сон таркиби ва қўмиталарнинг номларини, шунингдек, Қонунчилик палатаси Спикери ўринбосарларининг сони ва мақомини белгиловчи ҳуқуқий нормаларни амалга ошириш кўзда тутилган.
