2025 йилда Қозоғистонда 200 дан ортиқ янги мактаб қурилади
ASTANA. Kazinform – 2019 йилдан буён Қозоғистонда кенг кўламли инфратузилма лойиҳалари амалга оширилди, бунинг натижасида 1 миллиондан ортиқ ўқувчи 1200 та янги мактабда ўринлар билан таъминланди, дея хабар беради Kazinform ҚР Таълим-маориф вазирлигига таяниб.
2023 ва 2024 йиллар якунлари айниқса аҳамиятли бўлиб, 510 минг ўринли 422 та мактаб фойдаланишга топширилди. Бу кўрсаткичлар мамлакат бўйича 32 та авария ҳолатидаги ва 71 та уч сменали мактабни тугатиш, шунингдек, 200 та мактабдаги ўринлар тақчиллигига барҳам бериш каби бир қатор муҳим масалаларни ҳал этишда ҳақиқий ютуқ бўлди.
Таълим инфратузилмаси бир неча йўналишларда фаол ривожланишда давом этмоқда. Давлат раҳбари ташаббуси билан “Қулай мактаб” миллий лойиҳаси доирасида 2025 йил охиригача 460 минг ўринли 217 мактаб қурилиши режалаштирилган. 2024 йилнинг ўзидаёқ 105 та янги форматдаги мактаб фойдаланишга топширилди, уларнинг 40 фоиздан ортиғи қишлоқ жойларда жойлашган. 2025 йил охиригача яна 112 та қулай мактаб қурилишини якунлаш режалаштирилган.
2023 йилда Таълим инфратузилмасини қўллаб-қувватлаш жамғармасининг ташкил этилиши ҳам худди шундай муҳим қадам бўлди, у коррупционерлардан олинган маблағлар ҳисобидан молиялаштирилади. Мазкур жамғарма ҳисобидан қарийб 100 минг ўринли 89 та мактаб қурилиши молиялаштирилди. Шундан 74,4 минг ўринли 61 та мактаб фойдаланишга топширилди.
Шу билан бирга, еттита йўналишда вилоят марказлари ва қишлоқлардаги 1000 та мактабни модернизация қилиш ишлари давом этмоқда. Кейинги уч йилда 4 мингдан ортиқ мактабнинг моддий-техник базаси янгиланди, яна 2 мингдан ортиқ мактаб замонавий робототехника, кимё, биология, физика ва STEM кабинетлари билан жиҳозланди.
— Давлат томонидан кўрилаётган мисли кўрилмаган чора-тадбирлар ўқувчилар сонининг кўплиги ва уч сменада ўқитиш масаласини сезиларли даражада камайтириш имконини берди. Бугунги кунда қарийб 3 минг мактаб бир сменада, 4,9 мингдан зиёд мактаб эса икки сменада ишламоқда. 2025 йилда қарийб 300 минг ўқувчига мўлжалланган яна 200 та янги мактаб қуриш режалаштирилган, — деди ҚР Таълим-маориф вазирлиги расмий вакили Мереке Амангелдиқизи.
Кейинги қадам мактаб инфратузилмасини ягона замонавий форматга келтириш бўлади. Шу мақсадда Давлат раҳбари топшириғига асосан 1 минг 300 га яқин, жумладан, қишлоқ жойларда 900 та мактабда капитал таъмирлаш ишлари амалга оширилади. Ушбу лойиҳа уч йилга мўлжалланган бўлиб, тўққизта асосий йўналишда амалга оширилмоқда. Ишлар томни алмаштириш, фасад ва деразаларни янгилаш, коммунал хизматлар - электр, иссиқлик, сув таъминоти, канализация ва вентиляцияни капитал таъмирлашни ўз ичига олади. Шунингдек, мактаб ҳудудини ободонлаштириш ва кўкаламзорлаштириш ишлари ҳам амалга оширилади.
Эслатиб ўтамиз, аввалроқ Қозоғистонда қанча кичик мактаблар мавжуд эканлиги ҳақида хабар берган эдик.
