2023 йилда газ ва кўмир нархи тушади - Жаҳон банки
Жаҳон банки ўзининг сўнгги ҳисоботида Brent нефтининг ўртача нархи 2023 йилда бир баррел учун 92 доллар бўлишини, 2024 йилда 80 долларга тушишини, лекин беш йиллик ўртача 60 доллардан анча юқори бўлишини прогноз қилган.
Ҳисоботда айтилишича, Европа Иттифоқининг Россия нефт ва газ маҳсулотларига қўйган эмбаргоси ҳамда 5 декабрдан кучга кирадиган суғурта ва юк ташиш чекловлари туфайли Россия нефт экспорти кунига 2 миллион баррелгача қисқариши мумкин.
Ҳисоботга кўра, G7 мамлакатларининг нефт нархи бўйича таклиф қилинган чегараси Россиядан нефт оқимига таъсир қилиши мумкин, аммо самарали бўлиши учун йирик ривожланаётган бозорлар ва ривожланаётган мамлакатлар иштирокини талаб қилади.
Жаҳон банкининг таъкидлашича, долларнинг кучайиши ва кўплаб ривожланаётган иқтисодиётлар валюталарининг қадрсизланиши озиқ-овқат ва ёқилғи нархларининг ошишига олиб келди, бу эса бутун дунё бўйлаб 200 миллион кишига таъсир кўрсатаётган озиқ-овқат хавфсизлигига таҳдидни янада кучайтириши мумкин.
«Хом ашё нархларининг ошиши ва валюта курсининг доимий қадрсизланиши кўплаб мамлакатларда инфляциянинг ошишига олиб келади»
, - дейди Жаҳон банкининг прогнозлар гуруҳи раҳбари Айхан Косе.
Унинг фикрич, ривожланаётган бозор ва ривожланаётган мамлакатлар «жаҳон молия ва товар бозорларида янада юқори ўзгарувчанлик даврига» тайёрланиши керак.
Банк маълумотларига кўра, энергия нархининг пасайишига қарамай, улар охирги беш йил ичида ўртача даражадан 75% юқори бўлади.
Табиий газ ва кўмир нархи 2023 йилда бу йилги рекорд даражадан пасайиши прогноз қилинмоқда. Аммо 2024 йилга келиб, Австралияда кўмир ва АҚШ табиий газ нархлари ҳали ҳам сўнгги беш йилдаги ўртача қийматдан икки баравар юқори бўлиши кутилмоқда. Ҳисоботда айтилишича, Европада табиий газ нархи деярли тўрт баробар қимматроқ бўлиши мумкин.
Муаллиф: Серикбол Қошмағанбетов
Фото: REUTERS/Johannes P. Christo
