Ўзбекистонда такрорий парламент сайлови якуний натижаси эълон қилинди

TASHKENT. UzA - Kazinform – Кеча Ўзбекистон Республикаси Олий Мажлис Қонунчилик палатаси ва маҳаллий кенгашлар депутатлигига такрорий овоз бериш жараёни бўлиб ўтди, деб хабар беради Kazinform УзАга ҳавола қилиб.

Агентликнинг хабар қилишича, Ўзбекистон Республикаси Олий Мажлиси Қонунчилик палатасига сайлов ўтказувчи 25 сайлов округидаги 1730 сайлов участкасида фуқаролар ўзлари танлаган номзодга такрорий овоз берди.

Унда Ўзбекистон Либерал-демократик партиясидан 15, Ўзбекистон «Миллий тикланиш» демократик партиясидан 11, Ўзбекистон «Адолат» социал-демократик партиясидан 10, Ўзбекистон Халқ демократик партиясидан 9, Ўзбекистон Экологик партиясидан 5 нафар номзод иштирок этди. Уларнинг 18 нафарини аёллар ташкил этди.

Бугун Ўзбекистон Республикаси Марказий сайлов комиссиясининг Халқаро матбуот марказида бўлиб ўтган мажлисида маълум қилинишича, такрорий овоз беришда Ўзбекистон Либерал-демократик партиясидан 11, Ўзбекистон «Миллий тикланиш» демократик партиясидан 2, Ўзбекистон «Адолат» социал-демократик партияси, Ўзбекистон Халқ демократик партияси ва Ўзбекистон Экологик партиясидан 4 тадан номзод Қонунчилик палатаси депутатлигига ўтган.

Эслатиб ўтамиз, 22 декабрь куни бўлиб ўтган сайловларда Ўзбекистон либерал-демократик партиясидан 43 номзод парламент депутатлигига сайланиб, Олий Мажлис Қонунчилик палатасида кўпчилик ўринга эга бўлганди.