Ўзбекистонда навбатдан ташқари президент сайловида овоз бериш бошланди

ТASHKENT. Кazinform - Ўзбекистонда навбатдан ташқари президент сайлови бўйича овоз бериш бошланди. Сайлов участкалари маҳаллий вақт билан соат 8:00 да очилди ва 20:00 гача ишлашни давом эттиради, деб хабар беради Кazinform мухбири.

МСК маълумотларига кўра, сайловчилар рўйхатига 19 миллион 593 минг 838 нафар фуқаро киритилган, 14 та округ сайлов комиссиялари тузилган, 10 784 та сайлов участкаси ташкил этилган. Хориждаги ўзбеклар учун 39 давлатда 56 та сайлов участкаси очилган. Қозоғистон ҳудудида Ўзбекистоннинг Астана, Алмати ва Ақтау шаҳарларидаги дипломатик ваколатхоналарида бўлимлар очилди.

Муддатидан ташқари президент сайловига тайёргарлик кўриш ва уни ўтказиш учун сарфланган маблағ 174,1 миллиард сўмни (15 миллион доллар) ташкил этади, бу 2021 йилда бўлиб ўтган аввалги президент сайловини ўтказиш учун ажратилган маблағдан 41 фоизга камдир.

Сайловни МДҲ, ШҲТ, ТДТ, ЕХҲТ, ЮНЕСКО ва бошқа халқаро ташкилотлардан 797 нафар хорижий кузатувчи, шунингдек, сиёсий партиялар ва фуқароларнинг ўзини ўзи бошқариш органларидан 53 минг 677 нафар маҳаллий кузатувчи кузатиб бормоқда. Сайловни 1,4 минг нафардан ортиқ хорижий ва маҳаллий журналистлар ёритмоқда.

Сайловда 4 нафар номзод бор. Экологик партиядан ўз етакчиси Абдушукур Ҳамзаев, Халқ демократик партияси – етакчиси Улуғбек Иноятов, «Адолат» социал-демократик партияси – Олий суд раисининг собиқ биринчи ўринбосари Робахон Маҳмудова, «ЎзЛиДеП» ҳукмрон партияси – амалдаги президент Шавкат Мирзиёев номзодини илгари сурди.

Сайловда ғалаба қозониш учун номзод 50 фоиздан кўпроқ овоз олиши керак. Сайловчиларнинг иштирок этиш чегараси 33 фоизни ташкил этади. МСК сайловнинг дастлабки натижаларини 10 июль куни эълон қилишга ваъда бермоқда.

Бу Ўзбекистоннинг янги Конституцияси кучга кирганидан кейинги илк сайловлардир. Энди президентлик муддати беш йилдан етти йилга оширилди. Ўзбекистоннинг янги асосий қонунининг қабул қилиниши республиканинг амалдаги раҳбари Шавкат Мирзиёевга ушбу лавозимга қайта сайланиш имконини беради.

Аввалроқ Ўзбекистон Президенти Шавкат Мирзиёев 2023 йил 9 июлга белгиланган муддатдан аввал Давлат раҳбари сайлови ўтказилишини эълон қилгани ҳақида хабар берилганди. Президентлик сайлови кампанияси бошлангани, шунингдек, Ўзбекистон раҳбари бўлишга кимлар даъво қилаётгани ҳақида Kazinform материалида ўқиш мумкин.

Муаллиф: Мадибек Жанибеков