Вақтнинг ўзгариши инсон руҳиятига таъсир қилмайди - мутахассис
ASTANA. Kazinform — Жорий йил 1 мартдан бошлаб Қозоғистонда вақт минтақаси ягона тизимга ўтказилади. Шу муносабат билан Астана тиббиёт университети академик Е.Даленов номидаги Тиббиёт профилактика илмий-тадқиқот институти етакчи илмий ходими Жанна Нурберген билан суҳбатлашдик, деб хабар беради Kazinform мухбири.
"Вақтнинг ўтиши психо-эмоционал омилдир. Бироқ вақт минтақасини 1 соатга ўзгартириш инсон руҳияти ва танасига сезиларли таъсир кўрсатмайди. Кўникиш учун 2-3 кун керак бўлади ва режимни қисқа вақт ичида созлаш мумкин. Мен Ғарбий минтақада туғилганман, бизда вақт Астана вақтидан 1 соат фарқ қилади. Ўз шаҳримда бир ҳафта ёки бир ой бўлиб, Астанага келганимда, сезиларли ўзгариш ёки жойга мослашишда қийинчиликлар бўлмади”, - дейди Жанна Нурберген.
Мутахассиснинг фикрига кўра, ҳар қандай нарсага мослашаётганда, биринчи навбатда уйқу ва овқатланишни созлаш керак.
“Овқатланиш - ухлашдан камида 3 соат олдин ичиш яхшидир. Худди шундай, ётишдан олдин кўп суюқлик ичмаслик яхшироқдир. Бу икки қоида одамга янги муҳит ва вақт фарқига тезда мослашиш имконини беради”, - дейди у.
Шунингдек, тадқиқотчи, соат алмашинуви тунда ёки мавсумий бўлмаган соатларда ишлайдиган одамларга таъсир қилиши мумкинлигини айтди.
“Бу ерда масала шундаки, улар ўз вақтида ухламайдилар. Чунки, тун - уйқу вақтидир. Агар сиз ўз вақтида ухламасангиз, инсон танасида гормонал зиддият юзага келади ва биоритм бузилади. Сабаби у киши кун давомида ухлайди. Бу тоифадаги одамларда соатнинг алмашиши сезилиши мумкин”, — деди маърузачи.
Бундан ташқари, Ж.Нурберген бу хабарни жамият томонидан қабул қилиниши ҳақида ўз фикрини билдирди.
“Соат минтақаси ўзгаради деган хабар тарқалгач, ижтимоий тармоқларда турли маълумотлар, фикрлар айланиб бормоқда. Вақтни олдинга ёки орқага силжитиш одамларни турли асаб касалликларига олиб келади, деганлар ҳам бор. Бу нотўғри фикр”, — дея хулоса қилди эксперт.
Эслатиб ўтамиз, 1 мартдан бошлаб бутун Қозоғистон бўйлаб ягона вақт минтақаси ўрнатилади. Ушбу ўзгартириш Ҳукумат қарори билан тасдиқланди.
Муаллиф: Даулет Изтилеу
