Ўзбекистонда ҳар йили қазиб олинадиган олтиннинг атиги 6 фоизи қайта ишланади – Шавкат Мирзиёев

ТАSHKENT. Kazinform – Ўзбекистонда йилига 100 тонна олтин қазиб олинади, бироқ унинг атиги 6 фоизи қайта ишланади. Бу ҳақда Наманган вилоятида жойлашган “Гавҳар груп” компанияси фаолияти билан танишган Ўзбекистон Президенти Шавкат Мирзиёев маълум қилди, деб хабар беради Kazinformнинг Тошкентдаги мухбири Алихан Асқар.

Ўзбекистон раҳбари матбуот хизматининг хабар қилишича, Шавкат Мирзиёев топшириғига асосан, келгусида олтин қазиб олиш ва қайта ишлаш соҳасини давлат томонидан қўллаб-қувватлаш янада ортади.

“Мамлакатимизда ҳар йили 100 тонна олтин қазиб олинади. Уни тадбиркорларга бўлиб-бўлиб тўлаш шарти билан сотишга рухсат берилади. Аслида бундай имконият ҳеч бир давлатда йўқ. Ваҳоланки, олтинимизнинг атиги 6 фоизи қайта ишланади. Ҳатто олтин ишлаб чиқарувчи бўлмаган давлатлар ҳам биздан кўра кўпроқ заргарлик буюмларини экспорт қилади. Биз бу соҳада анча орқадамиз. Шунинг учун ишлаб чиқариш учун қўшимча шарт-шароит яратамиз”, – деди Шавкат Мирзиёев “Гавҳар груп” корхонаси ходимлари билан учрашувда.

Шу билан бирга, Ўзбекистон Президенти ишбилармонлар билан фикр алмашиб, ушбу соҳани қўллаб-қувватлаш бўйича қонунчилик базасини такомиллаштириш масалаларини муҳокама қилди.

Бундан ташқари, йил бошидан буён Ўзбекистоннинг олтин валюта захиралари 2,37 миллиард долларга камайди. 1 март ҳолатига кўра, расмий захира активлари 34,56 миллиард доллардан 32,19 миллиард долларга қисқарди.

Шунингдек, 2023 йил якунларига кўра, Ўзбекистоннинг олтин валюта захиралари 1,2 миллиард долларга, қимматбаҳо металлар миқдори эса қарийб 24,8 тоннага камайди.

Умуман олганда, ўтган йилнинг октябр ва ноябр ойларида Ўзбекистон кўп олтин сотган давлатлар орасида етакчилик қилди.