Қозоғистон ва Ўзбекистон етакчиларининг норасмий учрашуви бўлиб ўтди
ASTANА. Kazinform - Қасим-Жомарт Тоқаев олий мартабали меҳмоннинг Алматига ташрифи учун миннатдорчилик билдириб, бундай норасмий учрашувлар яхши анъанага айланганини таъкидлади. Бу ҳақда Ақорда маълум қилди.
– Бу қардош ва дўст давлатлар ўртасидаги ҳамкорликни ривожлантириш борасида амалга оширилаётган ишлар юзасидан навбатдаги ишбилармонлик муҳокамаси учун қулай фурсатдир. Биз иттифоқчи давлатлармиз. Икки давлат ўртасидаги ҳамкорлик бутун Марказий Осиё минтақасидаги вазиятга бевосита таъсир қилади, — деди Қозоғистон Президенти.
Давлат раҳбари Шавкат Мирзиёевнинг қардош халқларни бир-бирига яқинлаштириш, минтақани барқарор ва хавфсиз ривожлантириш йўлидаги муштарак мақсадларни илгари суришдаги улкан ҳиссасини таъкидлади.
Ўзбекистон Президенти икки томонлама алоқаларни мустаҳкамлашга қаратилган бугунги учрашув муҳимлигини таъкидлади.
– Мени она шаҳрингизда, хусусан, Алмати шаҳрида икки халқ анъаналарига содиқ қолган дўстона руҳ ва хушмуомалалик билан кутиб олганингиз учун ташаккур. Ўз номимдан ва халқим номидан миннатдорчилик билдираман. Сўнгги йилларда муносабатларимиз бутунлай янги босқичга кўтарилди. Биз — иттифоқчилармиз. Ўзаро ҳурмат-эҳтиромимиз туфайли кўплаб масалалар ўз ечимини топмоқда, барча ўзаро келишувлар амалга оширилмоқда. Ҳақиқий натижалар бор. Сизни Қозоғистоннинг улкан ютуқлари билан табриклайман. Иқтисодиётларингиз ривожланмоқда, ютуқларингиз юксак. Биринчи чоракни 5,4 фоиз билан якунладингизлар. Бугунги учрашувимиз расмий бўлмаса-да, мен катта контингент билан келдим. Бироқ ҳар бир бундай норасмий учрашув муносабатларимизга, барча келишувларимиз амалга оширилишига янги суръат бағишлайди, – деди Шавкат Мирзиёев.
Томонлар сиёсий, савдо-иқтисодий, транспорт-логистика, сармоя, энергетика, сув хўжалиги, саноат кооперацияси ва туризм соҳаларидаги ўзаро ҳамкорлик истиқболларини ҳар томонлама муҳокама қилдилар. Маданий-гуманитар алоқаларни ривожлантиришга алоҳида эътибор қаратилди. Бундан ташқари, минтақавий ва халқаро кун тартибидаги долзарб масалалар кўриб чиқилди. Учрашув якунида президентлар Қозоғистон-Ўзбекистон стратегик шериклигини янада чуқурлаштиришга содиқ эканликларини тасдиқладилар.
