Туркиядаги норозиликлар: 1900 га яқин одам қўлга олинди

ASTANА. Kazinform — Туркияда 19—25 март кунлари бўлиб ўтган оммавий норозилик намойишлари чоғида 1879 киши ҳибсга oлинди.Бу ҳақда 27 март, пайшанба куни мамлакат ички ишлар вазири Али Ерликая маълум қилди, дея хабар беради DW.

Вазирнинг сўзларига кўра, ҳибсга олинганларнинг 260 нафари ҳибсда, 662 нафарининг иши кўриб чиқилмоқда, 489 нафари эса озодликка чиқарилган.

Туркия ички ишлар вазирлиги dpа агентлигига барча намойишчилар ҳуқуқ-тартибот идораларига қаршилик кўрсатгани учун ҳибсга олинганини айтди.

Ерликаяга кўра, оммавий намойишлар чоғида 150 нафар полициячи яраланган. Мамлакатда оммавий йиғилишларга қўйилган тақиқ 1 апрелгача узайтирилди.Аввалроқ 1100 дан ортиқ одам ҳибсга олингани хабар қилинган эди.

Эслатиб ўтамиз, Туркияда оммавий норозилик намойишлари Истанбул мэри ва мухолифат етакчиларидан бири Экрем Имомўғлининг қўлга олиниши ва кейинчалик қамалиши ортидан бошланган эди.

Истанбулда йиғилиш ва митинглар тақиқланганига қарамай, мамлакатнинг бир қанча вилоятларида норозилик намойишлари бўлиб ўтди.

23 март куни Экрем Имомўғли Туркия президентлигига номзод сифатида кўрсатилган эди.