Туркия табиий газ импортини 21,7 фоизга қисқартирди
ASTANA. Kazinform — Туркияга табиий газ етказиб бериш ҳажми йиллик ҳисобда 21,7 фоизга қисқарди, деб хабар беради Kazinform агентлигининг Анқарадаги махсус мухбири Daily Sabahга таяниб.
Туркиянинг Энергия бозорини тартибга солиш бошқармаси (EPDK) маълумотларига кўра, июль ойида мамлакатга қарийб 3,06 миллиард куб метр табиий газ импорт қилинган. Бу ўтган йилнинг шу ойидаги кўрсаткичдан 21,7 фоизга кам. Шундан 2,87 миллиард куб метри қувур орқали етказиб бериладиган газга, 194,05 миллион куб метри эса суюлтирилган табиий газ (СТГ)га тўғри келади.
Қувур орқали газ етказиб берган асосий давлат Озарбайжон бўлди — 1 миллиард куб метрдан ортиқ. Ундан кейин Россия — 948,49 миллион куб метр ва Эрон — 919,33 миллион куб метр кўрсаткич билан қайд этилди. Туркия СТГнинг барча ҳажмини Жазоирдан импорт қилди.
Табиий газ истеъмоли ҳам 25,2 фоизга камайиб, 2,65 миллиард куб метрни ташкил этди. Шу билан бирга, июль ойи охирида газ захиралари 5,64 миллиард куб метрга етиб, йиллик ҳисобда 30,5 фоизга ошди.
Июль ойида нефть ва нефть маҳсулотлари импорти қарийб 4,52 миллион тоннани ташкил қилди. Бу ўтган йилнинг шу даврига нисбатан 6,9 фоизга кам. Хом нефть импорти эса 0,32 фоизга ошиб, 2,93 миллион тоннага етди.
Нефть ва нефть маҳсулотларининг асосий етказиб берувчиси аввалгидек Россия бўлди. Унинг улуши 1,66 миллион тоннани ташкил этди. Ундан кейин Ироқ — 653,5 минг тонна ва Қозоғистон — 508 минг тонна кўрсаткич билан ўрин олди. Қозоғистоннинг улуши умумий импорт ҳажмининг 11,24 фоизини ташкил этди.
