Туркия Қозоғистон билан савдо ҳажмини 15 млрд долларга етказишни режалаштирмоқда
ASTANA. Kazinform — Режеп Таййип Эрдоған Қозоғистон билан товар айирбошлаш ҳажмини 15 миллиард долларга етказишни мақсад қилганини маълум қилди, деб хабар беради Ақорда матбуот хизмати.
Туркия президенти Қасим-Жомарт Тоқаевни ва қардош қозоқ халқини Республика куни билан табриклади. Режеп Таййип Эрдоған яқинда Анқарада қозоқ давлатчилиги тарихига бағишланган «Қурултой феномени» китобининг тақдимоти бўлиб ўтганини таъкидлади. Бундан ташқари, «Наврўз — туркий дунёнинг умумий мероси» китоби қозоқ тилига таржима қилинди.
“Жорий йил май ойида Астанага ташрифим давомида бир қатор муҳим ҳужжатларни, жумладан, Абадий дўстлик ва кенгайтирилган стратегик шериклик тўғрисидаги декларацияни имзоладик. Стратегик ҳамкорлик кенгашининг навбатдаги йиғилишида ўзаро муносабатларимизни аниқ қадамлар билан янада мустаҳкамлаймиз. Биз товар айирбошлаш ҳажмини 15 миллиард долларга етказиш ва инвестициявий алоқаларни фаоллаштириш ниятидамиз”, — деди Туркия раҳбари.
Музокаралар давомида икки давлат раҳбарлари транспорт-логистика, энергетика, сунъий интеллект, қишлоқ хўжалиги, мудофаа саноати ҳамда маданий-гуманитар соҳалардаги ҳамкорлик масалаларини муҳокама қилдилар.
Эслатиб ўтамиз, аввалроқ Қозоғистон Президенти Туркияга расмий ташриф билан боргани ҳақида хабар берилган эди.
