Туркистонда уч эгизак туғилди

TÜRKISTAN. Kazinform - Туркистон вилояти раҳбари уч эгизак дунёга келтирган вилоят фуқаросини табриклади, деб хабар беради Кazinform мухбири.

11 февраль куни Туркистон шаҳрида яшовчи Улдар Момбекова уч эгизакни дунёга келтирди. Барчаи — ўғил болалар. Уларга Муҳаммад, Маҳмуд ва Аҳмад исмлари берилган. Янги туғилган чақалоқларнинг вазни 2010, 1950 ва 2050 граммни ташкил этди. Чақалоқлар муддатидан олдин туғилгани учун уларни биринчи кунларда махсус тиббий аппаратда жойлаштириш керак эди. Барча зарур тиббий муолажалар, текширувлар, даволаш ва парваришлар пухта ташкил этилди. Бугунги кунда она ва унинг болаларининг аҳволи яхши, улар тез орада уйларига қайтишни режалаштиришган.

Кўп болали она турмуш ўртоғи Самат Кўкенов билан 14 йиллик бахтли ҳаётни нишонламоқда. Бугунда улар етти нафар фарзандни тарбияламоқда. Уч қиз ва бир ўғилдан иборат оилага эндиликда уч ўғил қўшилди.

Туркистон вилояти раҳбари Нуралхан Кўшеров уч эгизакни дунёга келтирган қаҳрамон аёлни ушбу муҳим воқеа билан табриклаш мақсадида Туркистон шаҳридаги 3-сон перинатал марказга ташриф буюрди.

– Туркистон вилояти ўзининг кўп болали оналари билан фахрланади. Ҳудудимизда барқарор ва таъсирчан демографик ўсиш кузатилмоқда. Республикамизда ҳар еттинчи бола Туркистон вилоятида туғилган бўлса, ўтган йили бу ерда 50 минг чақалоқ дунёга келди. Вилоят марказида яшовчилар сони жадал суръатлар билан ўсиб бормоқда. Сиздек мустаҳкам ва фаровон оилалар кўпайсин, фарзандлар сони кўпаяверсин. Сиз билан чин дилдан фахрланамиз, — деди Нуралхан Кўшеров.

Ўтган йили Туркистон вилоятида 11 уч эгизак ва 260 эгизак дунёга келди. Вилоятда 185 минг нафардан ортиқ кўп болали оналар, жумладан, 18 минг нафардан ортиқ “Алтын алқа”(олтин медаль маъносида) соҳибаси, 43 минг нафардан ортиқ “Күміс алқа” (кумуш медаль) соҳибаси, фарзандларини муносиб тарбиялаётган аёллар истиқомат қилмоқда.

Эслатиб ўтамиз, ўтган йили Туркистон вилоятида Ҳасан, Фотима, Ҳусан дунёга келгани ҳақида хабар берган эдик.