Трамп Россияни Украинадаги ҳарбий можарога барҳам беришга чақирди
ASTANA. Kazinform – АҚШ президенти Дональд Трамп Россияни Украинадаги ҳарбий можарога барҳам бериш бўйича музокаралар ўтказишга чақириб, дипломатия зарурлигини айтди. Бундан ташқари, у можаро давом этса, иқтисодий нуқтаи назардан оғир оқибатлар бўлишидан огоҳлантирди, деб хабар беради Кazinform.

“Мен Россияга зарар етказмоқчи эмасман. Мен рус халқини яхши кўраман ва радикал сўлчиларнинг айбловларига қарамай, президент Путин билан доим жуда яхши муносабатда бўлганман. Россия 60 000 000 га яқин одамнинг ҳаётига зомин бўлган Иккинчи Жаҳон урушида ғалаба қозонишга ёрдам берганини ҳеч қачон унутмаслигимиз керак. Буларнинг барчасини инобатга олган ҳолда, мен иқтисодиёти орқага кетаётган Россия ва Президент Путин учун КАТТА ЯХШИЛИК қилмоқчиман. Ҳозироқ келишув тузинг ва бу бемаъни урушни тўхтатинг! Акс ҳолда ОХИРИ ЯХШИ БЎЛМАЙДИ”, – деб ёзди Трамп Truth Social саҳифасида.
Шунингдек, у:
“Тез орада “келишув”га келмасак, Россиянинг АҚШ ва бошқа давлатларга сотган ҳамма нарсасига юқори солиқлар, божлар ва санкциялар киритишдан бошқа чорам қолмайди. Мен президент бўлганимда ҳечқачон бошланмайдиган урушни тўхтатайлик! Биз осон ёки қийин йўлни танлашимиз мумкин – албатта, осон йўл ҳар доим яхшироқ. “КЕЛИШУВ” вақти келди. ОДАМЛАР ЭНДИ ЎЛМАСЛИГИ КЕРАК!!!”, деб ёзди у.

Аввалроқ АҚШ президенти Дональд Трамп ўз жамоасига инаугурациядан сўнг бир неча кун ичида Россия президенти Владимир Путин билан телефон мулоқотини ташкил этишни топширгани ҳақида ёзган эдик.