Сакен Бибосинов Олимпиада йўлланмасини қўлга киритди
ASTANA. Kazinform – Қозоғистонлик боксчи Сакен Бибосинов Италиянинг Бусто-Арсицио шаҳрида бўлиб ўтган лицензион турнирининг чорак финалида рақибини мағлуб этиб, Париж Олимпиадасига йўлланма олди.
Хусусан, 51 килограмм вазн тоифасида жанг қилган қозоғистонлик боксчи Европа чемпионати кумуш медали совриндори британиялик Киаран Макдональдни чорак финалда мағлуб этиб, лицензияни қўлга киритди.
Бибосинов биринчи ва иккинчи раундда рақибидан яққол устун келди, учинчи раундда битта нокдаунга тушди.
Ҳакамларнинг якдил қарори билан қозоғистонлик спортчи Олимпиада йўлланмасини қўлга киритди.
Шу тариқа Сакен Бибосинов ўз фаолиятида иккинчи марта Олимпиадада иштирок этади. У бунгача Токио Олимпиадасида қатнашган.
Шунингдек, қозоғистонлик боксчилардан кеча Айбек Оралбай чорак финалда америкалик боксчи Жамар Тэллини мағлуб этиб, Париж Олимпиадаси йўлланмасини қўлга киритгани ҳақида ёзган эдик.
Бу қозоғистонлик боксчиларнинг Италияда қўлга киритган иккинчи йўлланмасидир. Эркаклар ўртасида эса умумий ҳисобда бу учинчи йўлланмадир.
Бунгача эркаклар ўртасида +92 кг вазн тоифасида иштирок этаётган Қамшибек Қонқабаев Парижга йўлланмани қўлга кирита олганди.
У ўтган йили Хитойнинг Ханчжоу шаҳрида бўлиб ўтган Осиё ўйинларида Олимпиада йўлланмасини қўлга киритган эди.
