Павел Дуровнинг акаси ҳам Францияда қидирувга берилган
ASTANA. Kazinform – Европанинг Politico нашри Telegram асосчиси Павел Дуровнинг акаси Николай Дуров ҳам Францияда қидирилаётгани ҳақида хабар берди. Бу ҳақда ТАСС агентлиги ёзди.
Қайд этилишича, Павел ва Николайни ҳибсга олиш учун ордерлар уюшган гуруҳ таркибида вояга етмаганларнинг порнографик тасвирларини сақлаш, тарқатиш ёки улардан фойдаланишга рухсат беришда иштирок этганликда айбланиб, 25 март куни чиқарилган.
Газетанинг ёзишича, ордерлар Telegram томонидан жавобсиз қолган, болалар порнографиясини тарқатиш ва ишлаб чиқаришда айбланган мессенжер фойдаланувчиларидан бирини аниқлаш бўйича сўровдан сўнг берилган. Жиноий гуруҳларнинг Telegramдан фойдаланиши ака-ука Дуровларни ҳибсга олиш учун ордер бериш учун асос сифатида ҳам кўрсатилган.
Politico хабарига кўра, иш материалларида мессенжер вице-президенти Илья Перекопский ҳам тилга олинган, бироқ уни ҳибсга олиш учун ордер берилган-берилмагани кўрсатилмаган.
Прокуратура ака-укаларни ҳибсга олиш учун ордер берилгани ҳақида газетага изоҳ беришдан бош тортди. Павел Дуровнинг адвокати ҳам терговга изоҳ беришдан бош тортди.
Франция матбуотига кўра, Павел Дуров 24 август куни Париж Ле Бурже аэропортида болаларга қарши жиноятлар, гиёҳванд моддалар савдоси ва фирибгарликда айбланиб ҳибсга олинган. Унга 20 йилгача қамоқ жазоси берилиши мумкин. Дуров Россия, Сент-Китс ва Невис, Франция ва БАА фуқароси.
