Париждаги тартибсизликлар хавфи туфайли Лувр, Орсе, Пикассо музейи ва Гран-Пале ёпилади
ASTANA. Kazinform - Франция Маданият вазирлиги пойтахтдаги бир нечта дунёга машҳур музей ва маданий объектлар 24 октябрь, шанба куни кутилaётган оммавий норозилик намойишлари муносабати билан режадан ташқари ёпилишини маълум қилди, деб хабар беради Kazinform агентлиги мухбири.
Гап Лувр, Орсе ва Пикассо музейлари, шунингдек, Гран-Пале кўргазмалар мажмуаси ҳақида боряпти. Вазирликнинг расмий баёнотида ташриф буюрувчилар хавфсизлигини таъминлаш, ходимларни ҳимоя қилиш ва санъат асарларининг сақланишини таъминлаш зарурлиги таъкидланган. Вазирлик ўз бошқаруви остидаги барча муассасаларни тегишли профилактик чораларни кўришга чақирган.
Ушбу қарор 17 октябрда содир бўлган воқеалардан кейин ҳам сақланиб қолаётган кескинлик фонида қабул қилинди. Ўшанда ҳаёт қийматининг ошишига қарши ва мактаб ўқувчиларини қўллаб-қувватлаш мақсадида ўтказилган намойишлар бир қатор шаҳарларда, жумладан, Парижда ҳам жиддий тартибсизликлар ва талончилик билан кечган эди.
Ушбу воқеалардан сўнг Франция ҳукумати хавфсизлик чораларини кучайтириш ва бўлажак норозилик намойишлари вақтида полиция иштирокини ошириш ҳақида эълон қилди.
Парижнинг айрим ҳудудларида вақтинчалик тунги комендантлик соати жорий этилган. Президент Эмманюэль Макрон шанба куни фақат олдиндан келишилган касаба уюшмалари юришларига рухсат берилишини маълум қилди.
Шу билан бирга, Гран-Пале мажмуасида ўтказилаётган халқаро замонавий санъат ярмаркаси Art Basel Paris ташкилотчилари тадбирни режалаштирилган муддатдан икки кун аввал — 23 октябрь, жума куни кечқурун якунлашга қарор қилди. Бундай қарор иштирокчилар, ташриф буюрувчилар ва экспонатлар хавфсизлигини таъминлаш мақсадида қабул қилинган.
Эслатиб ўтамиз, аввалроқ Kazinform 19 октябрда Франциядаги мактаб ўқувчиларининг норозилик намойишларини қўллаб-қувватлаган санъат ва маданият таълими муассасалари талабалари Луврга кириш жойини тўсиб қўйгани ҳақида хабар берган эди. Ушбу акция туфайли музей одатдаги вақтда очила олмаган. Намойишда асосан Лувр олий мактаби ва Париждаги бошқа таълим муассасалари талабалари иштирок этган.
