Лувр музейига ноқонуний кирган талаба ушланди
ASTANA. Kazinform — Париждаги Лувр музейи ходимлари музей ёпилганидан кейин бинога ноқонуний равишда кирган 26 ёшли талабани аниқлади, деб хабар беради Report.
Полиция ёш йигитни 16 октябрдан 17 октябрга ўтар кечаси музейнинг техник йўлакларидан бирида юрган вақтида ушлади. Ҳодиса жойига етиб келган полиция музейга ҳеч қандай зарар етказилмаганини аниқлади. Бироқ қўриқлаш сигнализацияси ишга тушмаган.
Дастлабки маълумотларга кўра, талаба бинога ёнғин ҳолатлари учун мўлжалланган захира чиқиш эшиги орқали кирган. Бундан аввал у музейнинг яна бир нечта бошқа кириш жойларини суратга олган.
Полиция уни бўлимга олиб борган. Текширув давомида унинг илгари ҳуқуқни муҳофаза қилувчи органлар эътиборига тушмагани маълум бўлди.
Париж прокуратураси маълумотига кўра, талабани ҳибсда олиш учун асос йўқ. Тергов давом этаётган вақтда у озод қилинди.
