Нефть нархи Трампнинг янги тарифлари ва ОПEК+ қарорлари фонида тушиб кетди
ASTANА. Кazinform – Таъминотнинг кўплиги таҳдиди ва савдо зиддиятларининг кучайиши нефть нархига босим ўтказмоқда, деб хабар беради Кazinform мухбири.
Нефть нархи пасайишда давом этмоқда. АҚШ президенти Дональд Трамп янги импорт тарифлари жорий этилиши, шунингдек, ОПEК+нинг ишлаб чиқариш ўсиш суръатларини тезлаштириш бўйича қарорини эълон қилганидан кейин бозор босими кучайди, деб хабар бермоқда Reuters.
Жума куни эрталаб Осиё бозорларида Brent нефтининг май фьючерслари бир баррели учун 69,83 доллардан сотилди.
Американинг WTI нефти 0,5 фоизга тушиб, 66,63 долларни ташкил қилди. Шундай қилиб, ҳар иккала нефть навлари бир неча ой ичида энг ёмон ҳафталик динамикани кўрсатди.
Бозор иштирокчилари Дональд Трампнинг чоршанба куни ўтказган матбуот анжуманидаги баёнотига муносабат билдиришди ва у уни "Озодлик куни" деб атади.
Оқ уй раҳбари Қўшма Штатларга олиб кириладиган барча товарларга базавий 10 фоизлик тариф жорий этилиши, шунингдек, мамлакатнинг асосий савдо ҳамкорлари учун тарифлар оширилиши ҳақида маълум қилди.
Гарчи нефть, газ ва нефть маҳсулотлари импортига янги чора-тадбирлар таъсир қилмаса-да, экспертлар инфляция ва рецессия хавфи ортиб бораётганини, шунингдек, нефть нархига босим ўтказаётган глобал савдо таранглигининг кучайишини қайд этдилар.
ОПEК+ қарори ноаниқликнинг қўшимча омилини қўшди. Иштирокчи давлатлар ишлаб чиқаришни кўпайтириш бўйича аввал келишилган жадвални тезлаштиришга келишиб олдилар. Май ойида ОПEК+ етказиб бериш ҳажмини кунига 411 минг баррелга оширади, бу дастлаб режалаштирилган суткалик 135 000 баррел ҳажмдан сезиларли даражада юқори.
- Бу жорий йилда нефть бозорида кутилаётган профицитни яқинлаштирмоқда. ОПEК+ етказиб бериш ҳажмининг ошиши ўртача оғирликдаги нефть етказиб бериш ҳажмини оширади, бу эса ўз навбатида Brent ва Dubai навлари ўртасидаги нарх фарқини оширади, - дейди ING таҳлилчилари.
Уларнинг таъкидлашича, Brent ва Dubai навлари ўртасидаги нарх фарқи йилнинг кўп қисмида чегарадан ташқарида бўлган.
Мутахассисларнинг огоҳлантиришича, нархларнинг кейинги ривожланиши Қўшма Штатлар ва унинг асосий ҳамкорлари ўртасидаги савдо алоқалари ривожига, шунингдек, ОПEК+ мамлакатлари ўзларининг янги ишлаб чиқариш квоталарига қай даражада амал қилишларига боғлиқ бўлади.
Эслатиб ўтамиз, Президент Доналд Трамп ўзининг “Америcа биринчи навбатда” дастури доирасида АҚШнинг барча савдо ҳамкорларига 10 фоизлик тариф ва бошқа ўнлаб мамлакатларга барча тармоқларни қамраб олувчи юқори тарифларни жорий этиш пакетини таклиф қилган эди.
