Мўғулистоннинг ташқи қарзи 7,4 фоизга ошди

ASTANА. Кazinform — Мўғулистоннинг умумий ташқи қарзи 2024 йилда 7,4 фоизга ўсиб, 37,1 миллиард АҚШ долларини ташкил этди, деб хабар беради Xinhua.

Бу ҳақда чоршанба куни Мўғулистон Миллий статистика қўмитаси хабар берди.

— Бу кўрсаткичга тўғридан-тўғри инвестициялар ёки компаниялараро кредитларнинг 14,4 фоизга ошгани таъсир кўрсатди, — дейилади расмий хабарда.

Қўмита томонидан эълон қилинган маълумотларга кўра, Мўғулистон ташқи қарзининг тахминан 46,5 фоизи тўғридан-тўғри инвестициялар ёки фирмалараро кредитлаш, 21,2 фоизи Мўғулистон ҳукуматининг умумий қарзи, қолган қисми эса Марказий банк ва бошқа жамғарма институтларининг қарзидир.

Айни пайтда Жаҳон банки экспертлари Мўғулистон иқтисодиёти 2025 йилда тоғ-кон саноатининг ўсиши ва ички талабнинг ошиши ҳисобига 6,5 ​​фоизга ўсишини башорат қилмоқда.

Эслатиб ўтамиз, аввалроқ Мўғулистондан топилган қадимий туркий битиктошдаги ёзувлар ўқилганлиги ҳақида хабар берган эдик.