ҚР Президентининг Пекиндаги нутқи Хитойдаги ижтимоий тармоқларнинг асосий мавзусига айланди
Қозоғистон Президенти Қасим-Жомарт Тоқаевнинг хитой тилида чиқиши ҳамон маҳаллий ижтимоий тармоқларнинг асосий мавзуларидан бири бўлиб қолмоқда. Журналист Ху Сицзинь томонидан жойланган видеони 500 дан ортиқ киши бошқаларга тарқатишган, деб хабар беради Kazinform.
18 октябрь куни Пекинда “Бир макон, бир йўл” ІІІ халқаро ҳамкорлик форумининг очилиш маросимида иштирок этган Қозоғистон Президенти нутқини хитой тилида бошлади. Тоқаевнинг видеоси дарҳол Хитойдаги турли ижтимоий тармоқларда тарқалди ва катта олқишлар билан қарши олинди.
Журналист Ху Сицзинь томонидан Хитойнинг «Weibo» платформасида (Facebookнинг хитойча версияси – таҳр.) жойланган видео деярли 650 минг марта кўрилган. Маҳаллий интернет фойдаланувчилари Қозоғистон Президентининг хитой тилини ўзлаштирганидан ҳайратда.
Улардан бири: “Унинг хитойчаси меникидан яхшироқ”, – деб ёзган бўлса, бошқаси “Овози ҳам ажойиб”, – деб изоҳ қолдирган.
Қасим-Жомарт Тоқаев “Пекин тил ва маданият университетининг аълочи битирувчиси” эканлиги ҳақида маълумот ёзганлар ҳам бор.
Хитойдаги яна бир машҳур ижтимоий тармоқ - «toutiao.com». У Тоқаевнинг хитой тилида гапираётгани акс этган видеони суратга олди ва 5000 дан ортиқ изоҳ ва 48 000 лайк тўплади.
"Тоқаевнинг нутқ даражаси жуда юқори ва у хитой тилини жуда яхши билади! Жаноб Президент учун лайк босаман”, – деб ёзади ўқувчилардан бири.
Яна бир киши: “Бу президентнинг хитойча гапириши уни тўғридан-тўғри халқ билан яқинлаштиради ва дўстлик туйғусини уйғотади. Қозоғистон ва Хитой ўртасидаги дўстлик самарали бўлишини тилайман!” – деб ёзган.