ҚР Президенти Мўғулистонга биринчи ташрифига алоҳида эътибор қаратишини айтди
ULAN-BOTUR. Кazinform – Қозоғистон ва Мўғулистон президентлари кичик гуруҳда музокара ўтказди, деб хабар беради Ақорда.
Қасим-Жомарт Тоқаев Ухнаагийн Хурэлсухга меҳмондўстлиги учун миннатдорлик билдириб, давлат раҳбари сифатида Мўғулистонга биринчи ташрифига катта аҳамият беришини таъкидлади. Давлат раҳбарининг сўзларига кўра, Мўғулистон Қозоғистоннинг муҳим ҳамкорларидан биридир. Ҳар икки халқнинг анъаналари, маданий-тарихий илдизлари муштарак.
“Ҳурматли Президент, бугун сизнинг таклифингизга биноан давлат ташрифи билан Мўғулистонга келдик. Бу мен ва Қозоғистон делегацияси учун катта шараф. Бугун биз муҳим икки томонлама ҳужжатларни, жумладан, Қозоғистон ва Мўғулистон ўртасида стратегик шериклик ўрнатиш тўғрисидаги декларацияни имзолаймиз. Бу қадам мамлакатларимизнинг барча даражадаги интеграциясини жонлантиришга асосланади. Бу икки халқ фаровонлиги учун янги имкониятларга йўл очишига ҳам ишонаман”, – деди Қасим-Жомарт Тоқаев.
Ўз вақтида Ухнаагийн Хурэлсух Қозоғистон Президентининг Мўғулистонга давлат ташрифи икки томонлама ҳамкорликни мутлақо янги босқичга кўтаришига ишонч билдирди.
“Дарҳақиқат, икки давлат ўртасида дипломатик муносабатлар ўрнатилганига 30 йилдан ошди. Қозоғистон президентининг Мўғулистонга сўнгги давлат ташрифи 16 йил аввал бўлган эди. Мамлакатимиз сизнинг бугунги ташрифингизни яқин йиллардаги икки томонлама ҳамкорликнинг истиқболли йўналишларини белгилаб берадиган лаҳза деб билади. Бу ташриф икки давлат муносабатларини стратегик шериклик даражасига олиб чиқиш нуқтаи назаридан жуда муҳим”, – деди Мўғулистон Президенти.
Маъноли суҳбат чоғида давлат раҳбарлари сиёсий, савдо-иқтисодий ва сармоявий алоқаларни ривожлантириш истиқболларига алоҳида эътибор қаратдилар. Шунингдек, қишлоқ хўжалиги, кон-металлургия комплекси, энергетика, транспорт-логистика, молия соҳаларидаги алоқалар масалалари муҳокама қилинди.
Давлат раҳбари Қасим-Жомарт Тоқаев қўшма лойиҳалар ва имзоланган ҳужжатларни сифатли амалга ошириш муҳимлигини таъкидлади.
Президентлар халқаро ва минтақавий кун тартибидаги долзарб масалалар, жумладан, кўп томонлама тузилмалар доирасидаги ҳамкорлик юзасидан фикр алмашдилар.
Учрашув якунида Мўғулистон Президенти Давлат раҳбарига 60 мингдан ортиқ сўзни ўз ичига олган қозоқча-мўғулча луғатни совға қилди.
Бундан аввал 28-29 октябрь кунлари Президент Қасим-Жомарт Тоқаев давлат ташрифи билан Мўғулистонда бўлиши ҳақида хабар берган эдик.
Давлат раҳбари Президент Ухнаагийн Хурэлсух билан музокаралар ўтказади. Шунингдек, у Мўғулистон Буюк Давлат Хурали Раиси Дашзэгвийн Амарбаясгалан ва Бош вазир Лувсаннамсрайн Оюун-Эрдэнэ билан учрашади. Минг йиллик тарихга эга икки халқ ўртасидаги муносабатлар бугунги кунда турли соҳаларда яхши даражада ривожланмоқда. Икки давлат раҳбарларининг навбатдаги учрашувида сиёсий ва иқтисодий алоқаларни мустаҳкамлаш масалалари муҳокама қилиниши, қатор музокаралар ўтказилиши мумкинлиги маълум қилинди.
