ҚР Президенти Европа комиссияси вице-президенти Кайя Каллас билан учрашди
ASTANA. Kazinform – Қозоғистон Президенти Европа Иттифоқининг ташқи ишлар ва хавфсизлик сиёсати бўйича Олий вакили – Европа комиссияси вице-президенти Кайя Каллас билан учрашди. Бу ҳақда Ақорда матбуот хизмати хабар берди.
Учрашувда Қозоғистоннинг Европа Иттифоқи билан яқинроқ интеграциялашуви истиқболлари муҳокама қилинди. Савдо-иқтисодий ҳамкорликнинг муҳим йўналишлари, хусусан, энергетика, саноат, рақамлаштириш, шунингдек, Транскаспий халқаро транспорт коридорини ривожлантиришга қаратилган йирик инфратузилма лойиҳаларини амалга оширишга алоҳида эътибор қаратилди.
Кая Калласнинг сўзларига кўра, Қозоғистон минтақадаги биринчилардан бўлиб Европа Иттифоқи билан Шериклик ва ҳамкорлик шартномасини имзолаган. Бу икки томонлама муносабатлар юксак даражада эканидан далолат беради. У Европа комиссияси ва Қозоғистон ўртасида виза режимини соддалаштириш бўйича келишувни ратификация қилиш жараёни бошланганини маълум қилди.
Давлат раҳбари қозоқ халқи бу хабарни жуда илиқ кутиб олганини таъкидлаб, бу қадам Европа давлатлари билан шахсий ва ишбилармонлик алоқаларини мустаҳкамлаш учун катта имконият яратишини таъкидлади.
Бундан ташқари, Қасим-Жомарт Тоқаев ва Кая Каллас халқаро ва минтақавий кун тартибидаги долзарб масалалар юзасидан фикр алмашдилар.
Давлат раҳбари глобал миқёсдаги беқарорликдан келиб чиқиб, дунёда рўй бераётган мураккаб воқеаларга жиддий ва масъулият билан муносабатда бўлиш муҳимлигини таъкидлади. Президентнинг сўзларига кўра, Қозоғистон барча долзарб халқаро муаммолар ва можароларни дипломатик музокаралар йўли билан ҳал этишга қатъий ишонади.
Қасим-Жомарт Тоқаев бу йил ўзининг 80 йиллигини нишонлаётган БМТ ҳамон универсал ва тенги йўқ ташкилот эканлигини таъкидлади. Шу билан бирга, у барча давлатлар ташкилот Низоми ва жаҳон давлатлари томонидан тан олинган халқаро ҳуқуқ тамойилларига амал қилиши керак, деб ҳисоблайди.
Учрашувда “Марказий Осиё – Европа Иттифоқи” форматидаги интеграция ҳолати ҳам кўриб чиқилди.
Эслатиб ўтамиз, Президент “Марказий Осиё” халқаро саноат кооперацияси тўғрисидаги қонунни имзолаган эди.
