ҚР Президенти эколог, ECO Network лойиҳаси раҳбари Евгений Мухамеджановни қабул қилди

ALMATY. Kazinform – Давлат раҳбари Қасим-Жомарт Тоқаев ECO Network лойиҳаси раҳбари Евгений Мухамеджанов билан учрашди. Бу ҳақда Ақорда матбуот хизмати хабар берди.

Учрашувда экологик маданиятни шакллантириш, экологик муаммоларни ҳал этишда фуқаролар, нодавлат нотижорат ташкилотлари ва бизнесни кенг жалб этиш масалалари муҳокама қилинди.

Қасим-Жомарт Тоқаев Евгений Мухамеджанов ташаббуси билан амалга оширилаётган ECO Network лойиҳасини ижобий баҳолади. Давлат раҳбари, энг аввало, инсон маданиятини, унинг атроф-муҳит билан муносабатини шакллантириш, шунингдек, маиший чиқиндиларни алоҳида саралаш ва қайта ишлашга қаратилган “Экохаб”, “Яшил офис”, “Яшил мактаб” йўналишлари экомаданиятни тараннум этишнинг самарали механизми сифатида кенг тарқатишга лойиқ эканлигини таъкидлади.

Евгений Мухамеджановнинг сўзларига кўра, Қозоғистон бўйлаб юзлаб компаниялар ва таълим муассасалари аллақачон ECO Network лойиҳасига қўшилган. Улар бизнес жараёнларига экостандартларни жорий этиб, иқтисодиётни карбонсизлантириш жараёнига катта ҳисса қўшмоқда.

Президент экологнинг ташаббуслари “Таза Қазақстан” умумхалқ экологик акцияси мафкурасига ҳамоҳанг эканлигига эътибор қаратди. Қасим-Жомарт Тоқаев Евгений Мухамеджанов “Жасил Алмати” лойиҳа офиси раҳбари сифатида шаҳарнинг экологик муаммоларини ҳал этишнинг самарали ва ижодий йўлларини амалга оширишига ишонч билдирди.