ҚР Бош вазири Италия компанияси раҳбарияти билан ишлаб чиқаришни маҳаллийлаштириш истиқболларини муҳокама қилди
ASTANA. Kazinform – Қозоғистон Бош вазири Олжас Бектенов жорий йилнинг январь ойида Римда Қозоғистон Республикаси Президенти иштирокида бўлиб ўтган Қозоғистон-Италия давра суҳбатида тузилган келишувлар ва меморандумларни амалга ошириш масалалари бўйича Италиянинг энергетика ва нефть-газ кимёси соҳасидаги етакчи ускуналар ишлаб чиқарувчи компаниялари раҳбарлари билан учрашди. Бу ҳақда Қозоғистон Республикаси Ҳукумати маълум қилди.
Ansaldo Energia бош директори Фабрицио Фаббри билан музокаралар чоғида инновацион технологиялардан фойдаланган ҳолда энергетика инфратузилмаси самарадорлигини ошириш чора-тадбирлари муҳокама қилинди. Бу йўналишда Италия компаниясининг газ ва буғ турбиналарини ўзлаштириш бўйича тажрибаси истиқболли деб ҳисобланади. Олдиндан қабул қилинган келишувга кўра, Алмати 3-ИЭМ учун иккита газ турбинаси ишлаб чиқарилади. Шу муносабат билан томонлар Қозоғистондаги газ турбинали қурилмалари учун бутловчи қисмларни маҳаллийлаштириш ва ўзаро манфаатли ҳамкорлик қилишдан манфаатдор. Бу мамлакатда газ-турбинали генератор мажмуалари учун турли бутловчи қисмларни ишлаб чиқариш ва электр энергияси ишлаб чиқариш ускуналари соҳасида юқори технологияли таъминот занжирини яратиш имконини беради.
Maire Tecnimont компанияси президенти Алессандро Бернини билан учрашувда углеводород хомашёсини чуқур қайта ишлаш, қўшимча қийматга эга юқори сифатли ва рақобатбардош маҳсулотлар ишлаб чиқаришни кўпайтириш соҳасидаги ҳамкорлик кўриб чиқилди. Айни пайтда Қозоғистонда жаҳон бозорида харидоргир полимерлар ва бошқа муҳим маҳсулотлар ишлаб чиқарадиган заводлар қуриш бўйича кенг кўламли лойиҳалар амалга оширилмоқда. Ўз навбатида, Maire Tecnimont компанияси полиэтилен, бутадиен, барқарор авиаёнилғи ишлаб чиқариш, шунингдек, газ тақсимлаш мажмуасини қуриш соҳасида инвестиция лойиҳаларини амалга оширишда иштирок этишдан манфаатдор. Қайд этиш жоизки, барқарор авиация ёқилғиси лойиҳаси бўйича ҳамкорлик Қозоғистонда авиация соҳасида яшил технологияларни ривожлантиришга катта ҳисса қўшмоқда. Ушбу ёқилғининг ишлаб чиқарилиши зарарли углерод чиқиндиларини камайтириш, экологик хавфсиз парвозни ошириш ва Қозоғистоннинг экологик технологияларнинг жаҳон бозоридаги мавқеини мустаҳкамлаш имконини беради.
Учрашувлар якунларига кўра, Бош вазир Олжас Бектенов иқтисодиётни диверсификация қилиш ва тузилмасини ўзгартиришга қаратилган кенг кўламли инфратузилмавий ташаббуслар муҳимлигини, қайта ишлашга алоҳида эътибор қаратди. Шунингдек, у Ҳукумат қўшма лойиҳаларни амалга оширишнинг барча босқичларида хорижий инвесторларга ёрдам кўрсатишга тайёрлигини тасдиқлади.
Эслатиб ўтамиз, бугун ҚР Бош вазири Олжас Бектенов Украина атрофидаги вазият туфайли мудофаа, ички ишлар, фавқулодда вазиятлар, ташқи ишлар, соғлиқни сақлаш, транспорт, энергетика, саноат ва қурилиш, миллий иқтисодиёт, молия вазирликлари билан ҚР Президентининг асосий ҳарбий ва фуқаролик объектлари хавфсизлигини таъминлаш бўйича кечиктириб бўлмайдиган чора-тадбирлар кўриш бўйича топшириқлари ижросига бағишланган тезкор йиғилиш ўтказди.
