Қозоғистоннинг Ўзбекистондаги Элчиси Саида Мирзиёева билан учрашди
ASTANA. Kazinform – Қозоғистоннинг Ўзбекистондаги элчиси Бейбит Атамқулов Ўзбекистон Президенти ёрдамчиси Саида Мирзиёева билан учрашди. Бу ҳақда Daryo.uz ёзди.
Учрашувда мамлакатлар ўртасидаги стратегик шериклик ва иттифоқчилик муносабатларини янада мустаҳкамлаш масалалари муҳокама қилинди.
“Маданий-гуманитар ҳамкорликни муҳокама қилар эканмиз, бўлажак қўшма тадбирлар, жумладан, А. Навоий номидаги театрнинг Астана ва Алмати шаҳарларига ижодий сафарлари, Қозоғистон Миллий музейи ва Абилхан Қастеев номидаги санъат музейидаги кўргазмалар, шунингдек, Туркистонда ёшлар форумини ташкил этиш юзасидан фикр алмашдик”, – деб ёзди Президент ёрдамчиси Telegram саҳифасида.
Ўзбекистон ва Қозоғистон раҳбарларининг эътибори ва қўллаб-қувватлаши туфайли ушбу тадбирлар юқори савияда ўтиши ва қардош халқлар ўртасидаги дўстликни янада мустаҳкамлашга хизмат қилишига ишонч билдирилди, дейилади хабарда.
Эслатиб ўтамиз, ўтган йилнинг август ойида Астана шаҳрида Алишер Навоий ҳайкали тантанали равишда очилган эди. Тадбирда Қасим-Жомарт Тоқаев ва Шавкат Мирзиёев иштирок этди.
Шунингдек, Бу йил Ўзбекистонда буюк қозоқ шоири Абай Қўнонбоевнинг 180 йиллиги кенг миқёсда нишонланади.
