Қозоғистоннинг давлат қимматли қоғозлари J. P. Morgan кузатув рўйхатига қўшилди
ASTANА. Кazinform – Қозоғистоннинг давлат қимматли қоғозлари GBI-EM (Government Bond Index – Emerging Markets)га киритиш учун J. P. Morgan кузатув рўйхатига қўшилди. Бу ҳақда Молия вазирлиги хабар берди.
J. P. Morgan индекс таснифини қайта кўриб чиқиш натижаларига кўра, Қозоғистонга 2026 йилда мамлакат давлат қимматли қоғозларини GBI-EM ривожланаётган бозорлар индексига киритиш имконияти учун Watch–Positive мақоми берилди.
12 ой ичида халқаро инвесторлар учун Қозоғистон давлат қимматли қоғозлари бозорининг мавжудлиги, шу жумладан халқаро клиринг ва ҳисоб-китоб инфратузилмаси орқали кириш имконияти баҳоланади. Индекс мезонларига жавоб берадиган облигацияларнинг ликвидлиги ҳам кўриб чиқилади.
Мақомнинг берилиши Қозоғистон Республикаси Молия вазирлиги ва Қозоғистон Миллий банкининг давлат қимматли қоғозлари бозорини ривожлантириш, бозор инфратузилмасини такомиллаштириш ва халқаро инвесторлар учун Қозоғистон молиявий воситаларининг мавжудлигини ошириш бўйича қўшма ишининг муҳим натижаси бўлди.
Янги кўриб чиқиш даврига ўтиш Қозоғистон давлат қимматли қоғозлар бозорини халқаро капитал бозорларига интеграциялашдаги ютуқларни тасдиқлайди. Индексга киритилиши хорижий инвесторлар базасини кенгайтиришга, ликвидликни оширишга ва қарз олиш харажатларини камайтиришга ёрдам беради.
Эслатиб ўтамиз, Қозоғистон инвестиция бозори барқарорлиги бўйича Марказий Осиёда етакчиликни сақлаб қолмоқда.
