Қозоғистонликларнинг жон бошига даромадлари бир йилда 13,3 фоизга ўсди
ASTANA. Kazinform – 2024 йилда қозоғистонликларнинг ўртача жон бошига номинал пул даромадлари 230 636 тенгени ташкил этди, дея хабар беради Kazinform агентлиги мухбири ҚР Миллий статистика бюросига таяниб.
Бюро маълумотларига кўра, аҳолининг номинал пул даромадлари аҳоли томонидан жорий истеъмол, ишлаб чиқариш фаолияти ва жамғариш учун йўналтирилган пул ресурсларидир. Уларнинг қиймати макродаражада ҳисоблаш усули билан белгиланади ва аҳолининг ёлланма ва якка тартибдаги бандлик (иш ҳақини яшириш ва иш билан банд аҳолини статистик ҳисоботларда қамраб олинмаганлиги ҳисобга олинган ҳолда) ва ижтимоий трансфертларни тўлашдан олинадиган пул даромадларини баҳолашни ўз ичига олади.
Аҳоли жон бошига даромад умумий даромадни доимий аҳоли сонига бўлиш йўли билан ҳисобланади.
— Аҳоли жон бошига ўртача номинал пул даромадлари, 2024 йилнинг тўртинчи чорагидаги ҳисоб-китобларга кўра, ойига 230 636 тенгени ташкил этди, бу 2023 йилнинг тўртинчи чорагига нисбатан 13,3 фоизга юқори, кўрсатилган даврдаги реал пул даромадлари эса 4,4 фоизга ошди, — дейилади МСБ хабарида.
Аҳоли жон бошига номинал пул даромадларининг максимал қиймати 2024 йилда Алмати шаҳрида қайд этилган (387 304 тенге), бу кўрсаткич республика бўйича ўртача кўрсаткичдан қарийб 2 баравар ошган. Астанада – 331 276 тенге. Энг кам даромадли ҳудуд Туркистон вилояти бўлиб қолмоқда (118 441 тенге), аҳолисининг даромади республика даражасининг деярли ярмини ташкил этади.
Эслатиб ўтамиз, аввалроқ Қозоғистондаги ўртача иш ҳақи ҳақида хабар берган эдик.
