Қозоғистонга Нидерландиядан иккита Амур йўлбарси олиб келинади

ASTANA. Kazinform - Сентябрь ойи охиригача Нидерландиядан Қозоғистонга иккита Амур йўлбарси олиб келиниб, популяциясини йўлга қўйиш режалаштирилган. Бу ҳақда ҚР Экология ва табиий ресурслар вазири Ерлан Нисанбаев Мажилиснинг ялпи мажлисида маълум қилди, дея хабар беради Каzinform мухбири.

Қозоғистонда Турон йўлбарсини қайта тиклаш бўйича ишлар олиб борилмоқда, бунинг учун мамлакатга худди шундай кичик тур - Амур йўлбарсини олиб келиш режалаштирилган.

– Тарихан Турон йўлбарси Балқашдаги Или дарёсининг атрофида ўрмонлар ва қамишзорларда яшаган. У ерда охирги йўлбарсни 1948 йилда кўришган. Ҳозир бизда популяцияни йўлга қўйиш дастури бор. Сентябрь ойининг охирига қадар Нидерландиядан иккита йўлбарс олиб келамиз. Булар Амур йўлбарслари, Турон йўлбарслари билан бир хил турга киради. Чунки фақат улар қаттиқ совуққа чидамли. Бошқа барча йўлбарслар фақат иссиқ ҳудудларга мослашган, — деди вазир.

Унга кўра, келгуси йилда Қозоғистонга Россиядан яна тўртта йўлбарс келтирилади.

Амур йўлбарсларини Қозоғистонга реинтродукция қилиш бўйича Россиядан ҳайвонлар олиб киришни назарда тутувчи лойиҳа музокаралар босқичида. Россия методикани ишлаб чиқди ва йўлбарсларни топширишга тайёр.