Қозоғистонга қизамиққа қарши 500 минг доза вакцина олиб келинди

Бугун Алматига қўшимча аҳолини иммунизация қилиш учун қизамиқ, қизилча ва паротитга қарши вакцинанинг 500 минг дозали партияси етиб келди, деб хабар беради Kazinform агентлиги.

Ҳозир Қозоғистонда қизамиққа қарши қўшимча эмлаш ишлари олиб борилмоқда.

ҚР Соғлиқни сақлаш вазирлиги аҳолини иммунизация қилиш учун қўшимча миқдорда вакцина сотиб олиш масаласини қўйди. Умуман олганда, қўшимча оммавий эмлаш учун 1,5 миллион дозадан ортиқ вакцина харид қилинди.

Қабул қилинган вакцина ҚР Соғлиқни сақлаш вазирлигининг санитария-эпидемиология назорати қўмитаси тақсимотига мувофиқ мамлакат ҳудудларига юборилади.

Ягона дистрибьютор иммунобиологик препаратларнинг логистикасини барча GMP ва GDP стандартларига мувофиқ амалга оширади.

Эмлаш учун «Serum Institute of India» томонидан ишлаб чиқарилган қизамиқ, қизилча ва паротитга (ҚҚП) қарши бирлаштирилган вакцина қўлланилади.

Қизамиққа қарши вакцина 60 йилдан бери қўлланилган ва касалликнинг тарқалишини тўхтатиш учун тавсия этилади.

Жорий йилда мамлакатда, дунёнинг кўплаб мамлакатларида бўлгани каби, қизамиқ билан касалланиш бўйича ноқулай эпидемиологик вазият кузатилмоқда.

Қизамиқ - ҳаво томчилари орқали тарқаладиган юқумли вирусли инфекциялардан биридир.

Қизамиқ билан касалланмаган ва унга қарши эмланмаган одамлар ҳаётлари давомида қизамиққа жуда мойил бўлиб қоладилар ва ҳар қандай ёшда касал бўлиб қолишлари мумкин.

Соғлиқни сақлаш вазирлиги мамлакат аҳолиси ўртасида қизамиқнинг янада тарқалишининг олдини олиш мақсадида 6 ноябрдан бошлаб қизамиққа қарши қўшимча оммавий эмлашни бошлади.

Аввало, 6 ойдан 11 ойгача бўлган болалар эмланади.

Декабрь ойидан бошлаб, эмлаш ҳолатидан қатъи назар, 2 ёшдан 5 ёшгача бўлган болалар, тиббиёт ходимлари (55 ёшгача), шунингдек, профилактик эмлашни ўтказиб юборган 18 ёшгача бўлган шахслар учун қизамиққа қарши қўшимча эмлаш режалаштирилган.

Мамлакатда болалар икки марта мунтазам равишда эмланади: биринчиси - 12-15 ойлигида, иккинчиси - 6 ёшда.