Қозоғистонда сув йўқотишларини камайтириш учун 746 та канал таъмирланади
ASTANА. Кazinform — ҚР Сув ресурслари ва ирригация вазирлиги умумий узунлиги 4,6 минг километрдан ортиқ бўлган 746 та каналда реконструкция ишларини олиб бормоқда.
Бу йил 964 километрлик каналларни таъмирлашни якунлаш режалаштирилган. Бу тахминан 200 минг гектар суғориладиган ерларнинг сув таъминотини яхшилаш имконини беради.
Суғориш тармоқларини реконструкция ва модернизация қилиш сув оқизиў пайтида йўқотишларни камайтиришга қаратилган. Бундан ташқари, бир қатор лойиҳалар доирасида автоматлаштириш элементларини жорий этиш режалаштирилган. Бу сув ресурсларини аниқ ҳисобга олиш имконини беради.
Суғориш тармоқларини модернизация қилишдан ташқари, 12 та гидротехник иншоотни реконструкция қилиш ва умумий сиғими 887 миллион куб метр бўлган бешта сув омборини қуриш ишлари олиб борилмоқда. Бундан ташқари, 142 та аҳоли пунктини юқори сифатли ичимлик суви билан таъминлаш мақсадида 12 та ичимлик суви таъминоти иншоотини қуриш бошланди.
— Давлат раҳбари Қозоғистон халқига йўллаган Мурожаатномасида қишлоқ хўжалигида сувдан энг самарали фойдаланиш зарурлигига алоҳида эътибор қаратди. Сув хўжалиги инфратузилмасини ривожлантириш сув ресурсларини тежашга ёрдам беради. Бу, айниқса, қишлоқ хўжалиги ишлаб чиқарувчиларининг аксарияти жамланган жанубий минтақалар учун муҳимдир. Сувни аниқ ҳисобга олиш учун реконструкция қилинаётган объектларда автоматлаштириш элементлари жорий этилмоқда, — деди Сув ресурслари ва ирригация вазири ўринбосари Жандос Салимов.
Эслатиб ўтамиз, Қозоғистондаги 23 мингдан ортиқ сув ҳавзалари рақамли назорат остида.
