Қозоғистонда экологик тоза ёқилғи ишлаб чиқариш учун барча шароитлар мавжуд – вазир ўринбосари

ALMATY. Kazinform – Алмати шаҳрида бўлиб ўтган “Яшил аэропортлар” минтақавий семинари доирасида Қозоғистон Республикаси Транспорт вазири ўринбосари Талғат Ластаев экологик тоза ёқилғи ишлаб чиқариш ҳақида гапирди.

Вазир ўринбосарининг сўзларига кўра, Қозоғистонда самолётлар учун экологик ёқилғи ишлаб чиқаришни очиш бўйича музокаралар олиб борилмоқда.

“2028 йилдан Европа Иттифоқи ҳаво ҳудудига фақат маълум миқдорда экологик тоза ёқилғидан фойдаланадиган авиакомпаниялар кира олади. Шу муносабат билан биз самолёт ёқилғиси билан боғлиқ турли лойиҳаларни кўриб чиқмоқдамиз. Улар орасида «ҚазМунайГаз-Аэро» экологик тоза ёқилғи ишлаб чиқариш билан шуғулланади. Саноат майдонида бундай ишлаб чиқаришни очиш бўйича халқаро банклар билан музокаралар олиб борилмоқда”, – деди Талғат Ластаев.

Транспорт вазири ўринбосари, шунингдек, Қозоғистонда экологик ёқилғи ишлаб чиқариш учун барча шароитлар мавжудлигини таъкидлади.

“Экологик ёқилғи анъанавий ёқилғига экологик қўшимчалар қўшиш орқали ишлаб чиқарилади. Унинг бир нечта турлари мавжуд. Ҳозир улар мамлакатда жорий этиш учун ўрганилмоқда. Қозоғистонда экологик ёқилғи ишлаб чиқариш учун барча шароитлар мавжуд. Чунки ўзимизнинг ёқилғи ишлаб чиқаришимиз бор. Келгусида халқаро JetA1 стандартига ўтишни бошлаймиз ва шу асосда экологик ёқилғи ишлаб чиқарамиз”, – деди у.