Қарағанди вилоятига йил бошидан буён 680 миллиард тенге сармоя киритилди

ASTANA. Kazinform — Йил бошидан буён Қарағанди вилояти иқтисодиётига 679,1 миллиард тенге сармоя киритилди. Бу ҳақда вилоят раҳбари Ермағанбет Бўлекпаев маълум қилди.

“Йил бошидан буён вилоят иқтисодиётига 679,1 миллиард тенге сармоя киритилди. Бу ўтган йилнинг шу даврига нисбатан 14,6 фоизга кўпдир. Вилоят харитасида иккита янги корхона пайдо бўлди. Йил охиригача 200 миллиард тенгедан ортиқ сармояга эга яна 8 та лойиҳани ишга туширамиз. Бу 2600 янги иш ўрни яратиш имконини беради. Йирик лойиҳалар қаторида мис ва феррокремний ишлаб чиқарувчи заводлар ҳам бор”, – дейди Ермағанбет Бўлекпаев.

Ҳокимнинг сўзларига кўра, саноат маҳсулотлари ишлаб чиқариш ҳажми 2,8 триллион тенгедан ошди. Асосий қисми ишлаб чиқариш саноатига тегишли. Бу 2,2 триллион тенге.

Вилоят раҳбари Qarmet компанияси фаолияти ҳақида гапирди.

“Хабарингиз бор, ўтган йили Давлатимиз раҳбарининг фармойишига кўра вилоятдаги энг йирик корхона – Qarmet компаниясида инвестор ўзгариб, гигант корхона фаолиятини тиклаш бошланди. Металлургия комбинатида чўян, пўлат ва ясси прокат ишлаб чиқариш кўпайди. Янги инвестор келганида, саккизта кондан фақат учтаси ишлаётган эди. Ҳозир еттита кон ишлаяпти. Қудуқлар сони 11 тадан 45 тага кўпайтирилди. Бу конларнинг узоқ йиллар ишлашини таъминлайдиган келажак учун асосдир”, - деди Ермағанбет Бўлекпаев.

Кончилар хавфсизлиги учун қидирув ва жойлашишни аниқлаш тизими жорий этилди. Ҳозир бу тизим “Қозоғистон” ва “Кузембаев” номли иккита шахтада ишлайди. Келгуси йилда барча конлар қопланади.

Эслатиб ўтамиз, аввалроқ Қарағанди вилоятида 1000 километрдан ортиқ йўл таъмирлангани ҳақида ёзган эдик.